Shillong, Jymmang 2 : Ka bynta ba nyngkong jong ka Khanasamari jongka ri ka la sdang ha ka 1 tarik Jymmang 2026 kaba la tip kum ka House Listing and House Census Operation (HLO).
Ka long ruh ka sien ba nyngkong eh ba ki long ïing longsem kin ïoh ban pynrung kyrteng da lade lyngba ka Self Enumaration Web Portal ha kaba yn ïoh ïa u SE ID bad yn sa wan pynshisha da ki nongthoh khanasamari ne ki Enumerator haba ki wan pynshisha sha ki ïing ki sem. Kane ka jingpynrung kyrteng da lade kan neh kumba 15 sngi kata naduh ka 1 tarik haduh ka 15 tarik Jymmang bad hadien kane ki nongthoh khanasamari kin sa wan rung sha ki ïing ki sem naduh ka 16 tarik haduh ka 14 tarik Jylliew 2026.
Ki Khlieh duh nongsynshar jongka jylla naduh u Lat ka jylla u CH Vijayashankar u dei uba nyngkong ban pynrung kyrteng ha Lok Bhavan. Nangta bud sa u Lamphang ka jylla u Thomas A Sangma ha Rupshi Bungalow, u Myntri Rangbah ka jylla u Conrad K Sangma ha ka jaka sah jongu ha Goodwood Bungalow, u Symbud Myntri Rangbah bah Prestone Tynsong bad u Ma Sniawbha lang Dhar ki pynrung kyrteng ïa lade ha ïing sah u Myntri Rangbah ha Goodwood Bungalow.
ïa kane ka jingpynrung kyrteng la leh ha ka jingïadon lang u Commissiorner bad Secretary ka sorkar jylla uba dei u State Nodal Officer na ka bynta ka Khanasamari, ki heh sorkar ka jylla, ki ophisar na ka Directorate of Census Operation, Deputy Commissioner East Khasi Hilla bad kiwei kiwei ki ophisar.
