Shillong, Jymmang 02: Ki pulit jong ka East Khasi Hills ki la ioh ban lum ia ka kuna kaba kot kumba ?1.5 lak ha ka jingkhynra naka checking ha Laitumkhrah Police Point ha ka miet sngi Thohdieng.
Ïa kane ka Enforcement Drive la pynlong da kaba buh ïa ki 30 ngut ki pulit pyniaid kali bad 15 ngut ki dkhot jong ka Special Operations Team.
Ki dkhot jong ka Durbar Laitumkhrah kiba kynthup ïa ki Rangbah Shnong bad ki Rangbah Dong ki la ïa don lang ban ai ka jingkyrshan ïa kane ka Enforcement Drive, ha kaba ki la kyrpad ba ïa kum kine ki jingthmu dei ban ïai bteng man ka por.
Ki pulit ki la pyntip ba ki don katto katne ki jingpynkheiñ aiñ ha ka por ba ki talasi.
“Ha ka por ba pynlong ïa ka jingkhynra, ka jingdain kuna na kiba pynkhein kala kot haduh ?1.5 lak”, la ong u SP ka East Khasi Hills u Bah Vivek Syiem.
“La lap ïa ki katto katne ki jingjia jong ka jingñiah kali da kaba la dih kyiad, ryngkat bad ki jingjia ba bun jait jong ki kali kiba la (modify) ne pynkylla dur be-aiñ,” u la bynrap.
Uwei u nongñiah u la pyrshang ban phet krad na ka jingpeit bniah bad u la buh hapdeng ka jingpynma ïa uwei u heh pulit.
“Ha kawei ka jingjia, uwei u nongniah scooty u la pyrshang ban niom beit ia u UBC SM Sangma katba u dang pyrshang ban phet krad na ka jingshah talasi”, la ong u SP.
“La sdang ban shim kam katkum ka aiñ kiba donkam ha kaba ïadei bad kane,” u la bynrap.
U Bah Syiem u la ong ba ki pulit ka distrik kin pynneh ia kane jingpyntreikam. “Ka EKH District kan dang bteng ïa ka jingtalasi ban pynlong ïa ki surok jong ngi kiba shngain bad kiba bit ba biang,” u la ong.
