Ngi kwah ka jingpynshai na ka KHADC halor ka jingïoh tender bad laisen khaïi ka NESS : KHNAM

Shillong, Ïaïong 30: Ka Khun Hynñiewtrep National Awakening Movement (KHNAM) ka la pyntip bad ka la pynpaw ruh ïa ka jingsngew lynngoh halor ka jingai aidak ïong jong ka KHADC halor ka jingtreikam jong ka NESS.
Lyngba ka kyrwoh khubor na ka liang jong u Working President jong ka seng u Bah Thomas Passah u la ong, “Ka jingkren jong u CEM ka KHADC ha kine ki bnai ba la dep ha kaba u la pyntip ba ka la lap ïa ka company security kaba kyrteng ka North Eastern Security Servises ka la leh ïa ka kam tuh (fraud) ha ka jingïoh jong ka ha ka tender ha ka NIT Sohra la pyntip ruh ba ka KHADC ka la pyndam ïa ka trading license kaba la ai sha ka karkhana ban pynïaid ïa ka contract ha ka KV Laitkor ha ryngkat lang bad ka jingai black list ïa kane ka karkhana bad ïa kine ki juh ki jingkren na ka liang jong u CEM u la dep ban pyntip hapoh ka dorbar jong ka KHADC haba jubab ïa ka jingkylli jong u nongïalam ka liang pyrshah (LO).”
“Hynrei u MD jong kane ka juh ka karkhana u la pyntip ba khlem shah black list lyngba kawei na ki lad pathai khubor kaba la mih ha kine ki sngi bad u la pyntip ruh ba khlem da la ïoh ïa kano kano ka jingthoh na ka KHADC bad u la pyntip ruh ba kam don kano kano ka jingpynduh (cancel) ïa ka Trading License kaba la ïoh na ka KHADC ban trei ïa ka contract bad ïa kane ka la kut ha ka 31 tarik jong u Lber 2026 bad ka jingbishar ïa ka tender ba thymmai ka dang ïaid shakhmat,” ong u Bah Passah.
“Lada ngim shim ïa kane ka jingpynshai jong kane ka NESS ka mut ba ka jingkren jong u CEM kadei tang lyngba ki rymmiang shyntur bad lyngba ki lad pathai khubor hynrei kam don kano kano ka jingshim kam kaba ka KHADC ka la shim ban pynduh ïa ka Trading license bad kumno u dang ïoh ban trei tad haduh ka por jong ka contract kan kut hi bad u dang ïoh ruh ban thep tender ha kane ka juh hi ka KV Laitkor, hato u CEM u la ïalam bakla lyngba ki jubab jong u ha ïingdorbar ba kyntang ka Council ka jubab bad ka jingpynshai kadei ban wan na KHADC,” ong u Bah Thomas Passah.