‘Wat tieh liew lep ïa lade’, kyntu ka AMPA ïa ki briew ki bym don jingshem phang halor ki dawai

Shillong, Ïaiong 30: Ka All Meghalaya Phramacist Association (AMPA) kaba dei ka kynhun jong ki nongshna dawai ne ki nongkhlem dawai kiba la ithuh ruh da ka sorkar namar ba kila ioh ïa ka registration, kila kyrpad ïa baroh ki pharmacist kiba buh ïa ka dukan retailing ne wholesale ba kim dei ban sngap ïa ka jingpynbna paidbah da ka Meghalaya Health Care Association (MHCA) kata ban khang ïa ki dukan die dawai ha ka 20 tarik u jymmang.
Haba ïa kren bad ki lad pathai khubor u Bah Emos Jones Syiemlieh uba dei u nongaiktien jong ka AMPA u la ong ba baroh ki pharmacist kiba la ioh ka jingithuh na ka sorkar kim dei ban khang satia ïa ki dukan dawai jong ki ha katei ka tarik ba la kdew haneng.
” Kane ka jingkyrpad jong ka AMPA ban plie beit ïa ki dukan die dawai ha ka 20 tarik u Jymmang ka long ban tip ba kino kita ki dukan die dawai kiba la pyniaid da heh spah kiba khlem ioh jingithuh na ka sorkar bad kiba khlem da don ïa u pharmacist uba la pyndep hok ïa ka jingpule ha kane ka lain” ong u Bah Syiemlieh.
Shuh shuh u Bah Syiemlieh u la pynpaw ba hapoh ka jylla Meghalaya ki don shibun bha ki dukan die dawai hynrei ba bun napdeng jong ki ym don uba trei ne uba long trai kiba la pyndep ïa ka jingpule kum u pharmacist, kumta ha ka 20 tarik u Jymmang un sa tip shai ba ki dukan kiba khang kin dei kiba la shu pyniaid da ki heh spah ki bym dei kiba la shemphang hynrei ki batai stad bad u la ong ‘Wat tieh liew lep ïa lade’.
U Bah Syiemlieh u la ong ba ka kamram jong ki pharmacist kadei ban da ïa syllok shwa bad ki da kylli pyrthew bha na ki briew kiba wan thied dawai khang ba kin sngewthuh bad tip ïa ka rukom ai dawai sha ki nongpang ne ki nongwan thied dawai.
Shuh shuh u la Bah Syiemlieh u la ong,”Ki pharmacist kidei ki bynta ba ha khmat eh ha kaba ïadei bad ka koit ka khiah, hynrei na ka liang jong ka sorkar pat ka khein sting bha ïa ka jingdawa jong ngi” u la ong bad bynrap ruh “Baroh kiba la pass ïa ka pharmacist hapoh kane ka Association ki don kumba ar hajar tam.”
“Ka jingkren u myntri ka tnad ka koit ka khiah ka paw ba u khein sting bha ïa ki pharmacist, kumta kila buh ka jingkyrpad ha ka sorkar jylla bay m dei ban khein sting ïa ki pharmacist lane ban leh suki bad lada ka sorkar kala dep ban shim ïa ki sienjam ruh kadei ban pyntip” ong u Bah Syiemlieh.
U Bah Syiemlieh u la pyntip ba ka jingdawa jong ka AMPA ka long, ba ka sorkar kadei ban thung kam ïa ki pharmacist ha ki jaka ai jingsumar kum ha ki Health Sub Centre, ki PHC bad ki CHC.
Ka jingdon jong ki Health Sub Centre hapoh ka jylla ki don haduh 473 tylli hynrei la thung pharmacist tang ïa u wei, ha ki kyrdan PHC ki don haduh 115 tylli hapoh ka jylla katba ki pharmacist kiba trei ki don kumba 123 ngut, ha ki kyrdan CHC ki don haduh 31 tylli bad ki pharmacist kiba trei ki don kumba 39 ngut.