Shillong, jymmang 01: Ka Pine Mount Higher Secondary School ka la pynkut noh ïa ka taïew ïalehkai lane ka ‘Sports Week’ kaba la sakhi ïa ka jingïashim bynta kaba shit rhem na ki khynnah skul, ki nonghikai, bad ki skul ba la shah khot sngewbha. Ha ka jingïalang pynhap pyrda la wan kongsan da u Myntri ka tnad pule puthi Bah Lahkmen Rymbui.
ïa ka jingïalang la pynlong ha ka jingïadon lang i Principal jong ka Pine Mount Higher Secondary School, ha ryngkat ki Principal bad ki nongmihkhmat na kiwei pat ki jaka pule ba pawnam ba kynthup ïa ka Step by Step School, St Edmund’s School, Shillong Public School, bad kiwei kiwei ki riew rangbah, ki kmie ki kpa.
Kane ka Sports Week ka la sakhi ym tang ïa ka jingïashim bynta kaba shit rhem na ki khynnah skul jong ka Pine Mount hynrei wat na ki skul ba la shah khot sngewbha kum ka Seven Set Higher Secondary School, ka Shillong Public School, ka Step by Step, bad ka St. Edmund’s School.
Ki khynnah pule ki la ïashim bynta ha ki jingïalehkai bapher bapher (athletic) kynthup ïa ka ïakop mareh kaba 100m bad 200m, ka relay, bad kiwei kiwei ki jingïalehkai na ka bynta ki khynnah shynrang bad kynthei. La sam ruh ïa ki takma bad syrnod sha ki nongjop kum ka jingithuh ïa ka sap ïalehkai ba tbit jong ki.
Haba kren ha kane ka jingïalang, u bah Lahkmen Rymbui u la ban jur ïa ka jingdonkam jong ka jingkmen bad ka jingmut jingpyrkhat kaba bha ha ka jingim jong ki samla pule. U la kdew ba watla ka jingminot ha ka jingpule ka long kaba kongsan, hynrei ka jinglong kaba kmen bad kaba ai mynsiem ha skul ka don ka bynta kaba kongsan ha kaba pynwan dur ïa ki briew kiba skhem bad kiba jop.
U Myntri u la kren ruh shaphang ki jingeh jong ka pyrthei mynta bad u la pynshlur ïa ki samla pule ba kin long kiba khlaiñ, kiba khuid ha ka jingmut jingpyrkhat, bad kiba bha ha ka rukom treikam jong ki. U la ai jingmut ïa ki samla pule ba kim dei ban ngop ha ka jingpynbor jong ki paralok, hynrei kidei ban ithuh ïa ka jinglong kyrpang jong ki bad ban bud ïa la ka jong ka lynti sha ka jingjop.
“Ka jinglong babha kam dei tang shaphang ka jingjop; ka dei shaphang kumno ngi pyntreikam ha ka jingim bad haba kynduh jingeh. Ka jingmut jingpyrkhat kaba kmen bad kaba bha kan ïalam beit beit ïa phi sha ka lawei kaba jop,” u la pynpaw.
U la ban jur ha baroh ki nongshim bynta, ki nonghikai, ki kmie ki kpa ban ïatreilang ha kaba pynroi ïa ki jingmut jingpyrkhat kiba dang samla bad ban tei ïa ka imlang sahlang kaba khlaiñ bad kaba shai.
Ha kane ka sngi ka la don ruh ka jingïaid ‘march past’ kaba itynnad bha da ki khynnah skul, kumjuh ruh ki jingïalehkai jong ki khynnah kiba la pyni ïa ki sap bapher bapher jong ki.
ïa ka prokram la pynkut ha ryngkat ka phuh ka phieng, kaba rakhe ym tang ïa ka jingtbit ha ka jingïalehkai hynrei ïa ka jingïatylli, ka jinglong ryntih, bad ka jingroi jong ki khynnah skul.
