Mawkyrwat, Jymmang 01: Ka Nativity Higher Secondary School, Mawkyrwat ka la long ka lahduh ha ka lympung ïalehkai jong ka 12th South West Khasi Hills District Level Inter School Athletics Meet 2026 (SWKJDL-ISAM) ba la pynlong ha Rowell Lyngdoh Stadium, Mawlangwir, South West Khasi Hills District.
Ka jingrah jong ka Nativity Higher Secondary School, Mawkyrwat ïa ka nam lahduh ka dei ruh ha ka sien kaba 11 (Khadwei) ha kaba ka la ïoh 14 tylli ki takma ksiar, 9 tylli ki takma rupa bad 8 tylli ki takma tnong. Katba ha ka March Pass pat la rah ïa ka nam lahduh da ka Little Start Higher Secondary School, Mawkyrwat.
Ha kane ka sngi la sam ruh ïa ki khusam shimet kata Best Athletes kiba hapoh 14 snem jong ki khynnah shynrang dei u Brandmaxson Lyngdoh jong ka Nativity HSS Mawkyrwat bad ka Saphi Pariong jong ka St. Mary’s HSS Mawthong, ki hapoh 16 dei u Robertson Marweiñ jong ka Nativity HSS Mawkyrwat bad ka Naisha Thyrniang jong ka Rangblang Pres. SS bad kiba hapoh ka 18 snem dei u Lawanpyndapkyrhai Kharsyiemlieh jong ka Mawranglang Pres. SS bad ka Lariakor Wanniang jong ka Balang Mawlangwir Girls SS.
Ha ka nam kum ki Best Team jong ki Kynthei dei ka Balang Mawlangwir Girls Higher Secondary School bad ka Nativity Higher Secondary School, Mawkyrwat. Nangta, Best Team jong ki shynrang dei ka Nativity Higher Secondary School, Mawkyrwat bad ka Kerlin’s Mawten Secondary Schy, Mawteb bad ka Little Start Higher Secondary School, Mawkyrwat.
Ïa kane ka lympung la pynïaid da ka ophis jong u District Sports Officer (DSO) ka South West Khasi Hills District ryngkat ka jingïatreilang bad ka South West Khasi Hills Athletis Association (SWKHAA) ha kaba u Co-Chairman ka Meghalaya State Development Reforms Commission jong ka Sorkar Meghalaya kum u kongsan.
Lah ban kdew ba ïa kane ka lympung ïalehkai jong ki khynnah skul la sdang naduh ka 29 tarik u Ïaïong, 2026 bad la pynkut mynta ka sngi ka 1 tarik u Jymmang, 2026 ha kaba ki don baroh 40 tylli ki skul bad 800 ngut ki khynnah kiba ïashimbynta ha ki jait jingïalehkai bapher bapher kata (Boys – 418 & Girls – 382) katba ha ka March Pass pat ki don baroh 11 tylli ki skul.
Kiwei de kiba ïa donlang ki kynthup ïa u bah Damang Syngkon, District Sports Officer ka South West Khasi Hills District, u bah M. War, General Manager ka DCIC, South West Khasi Hills District, u bah I. Lawriñiang, MCS, Block Development Officer ka Mawkyrwat C&RD Block bad kiwei de ki ophisar kynthup ïa ki nonghikai bad ki khynnah skul.
