MSL 5: Pynkyndit ka Umdang Pyllun ïa ka Rangdajied; bteng jingjop ka Langsning, Shkenshynriah bad Lajong

Shillong, Jymmang 01: Ka Seng Samla Umdang Pyllun ka la wanrah ïa kawei na ki jingïalehkai kaba pynkyndit ha ka lympung 5th Meghalaya State League hadien ba ka la wanphai na ka shi kol ban pynliem ïa ka Rangdajied United, kaba dei ka lahduh jong u snem 2023, da 2-1 ha ka jingïakhun jong ka Group H ha Mawkyrwat hynne ka sngi Thohdieng.
Ka Rangdajied ka la sdang janai bha da kaba pynkhihjar ha ka minit kaba 15 lyngba u Elnathan D Wahlang hynrei ki artylli ki kol kiba stet na ka Umdang Pyllun ha ka kylla miet ki la pynkylla khongpong ïa ka jingïalehkai. Kaba nyngkong la thep da u Rangkynsaistar Mawsor (59′) bad tang hadien saw minit u Wanbhalang Mawsor (63′) u la buh hakhmat ïa la ka jong ka kynhun. Da katei ka kol u Rangkynsaistar u wan ba nyngkong ha ka thup jingkheiñ Top Scorer jong ka Group H da kaba ïoh 6 kol, bad u la ïoh ban pynkhihjar ha baroh san tylli ki jingïalehkai jong ka Umdang Pyllun.
Da kane ka jingjop ka Umdang Pyllun ka la jam shipor sha ka kyrdan ba ar ha ka Group, katba ka Mawlarshong SC ka lah ban knieh ïa katei ka kyrdan namar ka duna tang 2 poiñ bad ka dang sah kawei ka jingïalehkai ha kti. Ka RUFC ka dei ka klob kaba nyngkong eh na Shillong ban shah rem ha kane ka samoi bad ka don ka jingma kaba ap namar ka lah ruh ban nym ïohrung sha ka jingïakhun pre-quarterfinal.
Hynrei ha kawei pat ka jingïakhun, kam shym la don satia kaba kum kane ka jingeh na ka bynta ka Shillong Lajong FC, lahduh ha u snem 2019, kaba la jop suk da 7-0 kol pyrshah ïa ka Iatyllilang Lumsehkot CSC ha ka Group E ha Wahiajer. Da kane ka jingjop, ka Lajong ka la pynthikna ïalade ban ïoh rung sha ka wat ïakhun kaba bud.
Ki kol na u Lalmuansanga (12′, 30’P), u Hamedamanbha Wahlang (28′), u Riborlang L Lyngkhoi (35′), u Samchaphrang Lato (39′) bad ka kol ba la thep hi da ka liang pyrshah ha ka minit kaba 23 ka la pynlong ïa ka Lajong ban lamkhmat lypa da 6-0 tang ha ka kylla step bad u Emanbha Marbaniang (90’+3) u la bynrap sa kawei ka kol ha ki minit pynjlan ba khatduh shuwa ban kut.
Nangta ka jingïakhun ha Mairang, la sakhi ïa kawei pat ka jingjop kaba shyrkhei ha kaba ka Langsning FC ka la pynjem khnap da 9-0 ïa ka Lawbah SC. Ka Langsning, kaba lamkhmat ïa ka Group F bad kaba la dep buh jaka ha ka pre-quarter, ka la pynkhihjar lyngba u Samuel Phawa (10′, 36′), u Damonlang Pathaw (12′, 50′), u Donlad Diengdoh (27′, 32′), u Dajiedlang Wanshnong (32′), u Ronneychel Khongrangjem (38′) bad u Nelson Rymbai (79′). U Nelson u dei uba lamkhmat ïa ka thup jingkheiñ na ka bynta ka khusnam ‘Top Scorer’ ha ka MSL 5 bad u la thep haduh 12 tylli ki kol haduh mynta.
Uba la ïasoh lang bad u Nelson ha ka jingïakhun na ka bynta ka nam ‘Top Scorer’ u dei u Keri G Momin (11’, 38’, 73’) ha ka Group G. Sa shi sien u la thep biang ïa ka hat-trick hynne ka sngi ha kaba ka A’chik SCO Rongjeng ka la pynliem noh ïa ka Attong Matgrik FC da 5-0 kol ha Williamnagar. Kiwei pat ki kol la thep da u Preioush N Sangma (12’) bad u Washbi Sangma (51’).
Ka jingïalehkai ha Khliehriat ruh ka la long kaba noh shiliang, ha kaba ka Rymbai Shkenshynriah SC ka la pynliem ïa ka Thangskai Tiger da 3-0. Baroh ar tylli ki kynhun ki la dep ban pyntikna ïa la ka jong ka jaka ha ka pre-quarterfinal shuwa kane ka jingïakhun, hynrei da kaba jop ka Shkenshynriah mynta ka la pynskhem ïa ka kyrdan ba nyngkong ha ka Group D. Kiba la pynkhihjar ki long u Skilful Tariang (3′), u Alwinson Bareh (56′) bad u Hesmiki Rymbai (78’P).
Kawei pat ka jingïakhun kaba noh shiliang hynne ka sngi ka dei ha ka Group B kaba la long ha MFA Ground, ha Shillong, ha kaba ka Mawlum Tyrsad SCC ka la pynneh pynsah ïa ka jingkyrmen ban rung sha ka wat ïakhun kaba bud da kaba pynliem ïa ka Mulang SC Nongbah da 6-0 kol. U Ebetstar Nongbet (48’, 71’, 75’) u la ïoh ban thep hat trick, katba u Banshem Khongsit (8’), u Fillbanstar Nongbet (86’) bad u Justlywell Jala (87’) ki la pynkhihjar mar shi sien. Watla ka Mawlum Tyrsad ka dang sah ha ka kyrdan kaba lai, hynrei ka dang ka jingkyrmen ban jam sha ka kyrdan kaba ar lada ka lah ban jop ïa ka Mawphu SC.
Khatduh eh, ka Laskein SCSC ka la wanphai na ka shi kol ha ka kylla miet ban pynliem ïa ka Amlarem SC da 2-1 ha ka Group C ha Amlarem. U Fiderme Dkhar (45’) u la buh hakhmat ïa ka Amlarem hynrei la shah pynïakhaid noh ha u Bundaki Lamare (65′) shuwa ba u Marsowki Suchiang (69′) un thep ïa ka namtam. Kane ka dei ka jingjop kaba nyngkong jong ka Laskein hadien ba ïakhaid lai sien bad shah rem shi sien, bad ka ai jingkyrmen ïa ka kynhun ban beh nadien ïa ka Amlarem bad knieh ïa ka kyrdan ba ar.
Ka promram ïalehkai mynta ka sngi (Baroh ha ka Por 3 baje nohphai sngi):
Group A (Shillong SSA Stadium) – Ym don
Group B (Shillong MFA Ground) – Nangkiew Irat SC pyrshah ïa ka Mawphu SC
Group C (Amlarem) – Mawlai SC pyrshah ïa ka Lamin XI SCC
Group D (Khliehriat) – Jalaphet Moochut Pyrdung SC pyrshah ïa ka Ladthadlaboh SC
Group E (Wahiajer) – Lumphyrnai Sohphoh FC pyrshah ïa ka Lamyrsiang SCC
Group F (Mairang) – Umlakro SC pyrshah ïa ka Mishon SSCC
Group G (Williamnagar) – Janepih YSCA pyrshah ïa ka Maram FC
Group H (Mawkyrwat) – Mawlarshong SC pyrshah ïa ka Mawten SC