Ujor ka JNC sha ka MSPCB halor ka public hearing ka Shree Cement

Khliehriat iaiong 30: Ka Jaiñtia National Council (JNC) Central Executive Committee kaba hapoh ka jingialam u President, u bah Sambormi Lyngdoh ka la leit ban ujor sha ka tnat Meghalaya State Pollution Control Board ha kaba ïadei bad ka public hearing jong ka Company Shree Cement Ltd ka ba yn sa pynlong ha ka 22 tarik u bnai jymmang 2026 ha Elaka Nongkhlieh, East Jaiñtia Hills District.
Haba kren sha ki pathai khubor, u nongialam ka JNC, u Sambormi Lyngdoh u la iathuh ïa ki mat kiba ka seng ka la ujor bad ong ruh ba “kaei kaba ngi lap shuh shuh ka long kaba sngew thamula haduh katta katta ba kumba paw hapoh ka notification ngi sngew phylla ba kumno ïa kane ka Terms of Reference (ToR) kaba lah pdiang ne aproved ha Gujarat kin wan leh pat ïa ka Mining hapoh ka jylla Meghalaya? Namar ïa kane ka bynta hato ïa kaba pdiang ne approved da ka State Environment Appraisal Committee Jong ka sorkar Gujarat lah mo ban treikam hapoh ka jylla Meghalaya ka jong ngi????. te kane ka lah long kaba i kamkai haduh katta katta, te kumno kine ki tnat treikam bapher bapher kata naduh ka SEIAA, MSPCB kiba dei ban peit ïa kane ka bynta, hato kumno ki khlem da examin ne bishar bniah ïa ki kot ki sla ha shwa ba kin pynbna ba kan sa don ka public hearing, te kane ka long kaei kaei ka bym lah ban pdiang bad katkum kane ka bynta jong ka EIA kaba don ha ka section 1.4 jong ka EIA jong ka Shree Cement bad ka jingkam ka Shree Cement bad kane ka jingpdaing ïa ka Term of Reference kaba da ka sorkar Gujarat kane ka dei ka mat kaba lah pyniap lypa shwa ïa kiei kiei kiba ka Shree Cement ka la pynbiang ba kumno ka Approval kaba ioh na Gujarat mynta kin pyntreikam hapoh jylla Meghalaya”
Shuh shuh la ong ba ka Shree Cement ka la ai ïa kane ka EIA khlem ka Mining Plan ba la mynjur da ka Indian Bureau of Mines, ïa kane la iathuh ne pynpaw hi katkum ka EIA jong ka company, ka seng ka kynthoh ba ka par mawshun hi kaba khlem don ka Mining Plan kam lah ban iaid shakhmat katkum ki kyndon Jong ka aiñ.
La ong ruh ba ha ka jingiakren bad u Member Secretary ka MSPCB, u bah G.Chyrmang, ka seng kala wanrah ïa shibun ki mat kiba ka company Shree Cement ka la pynkheiñ kiba dei ki kyndon kiba hapoh ka EIA jong ka “Ngi la buh da ka jingthoh ha ka MSPCB halor ka jinglap ka jong ngi kiba bun hapoh kaiphot EIA jong ka company Shree Cement na ka bynta ban pynlong ïa ka public hearing kaba thmu ban khlong ïa u mawshun na kawei ka par kaba don ha elaka Nongkhleh kaba heh 217 hectar, kaba ngi pynpaw ha ka jingthoh ka long ka jingheh ka jaka, namar ha ka jingshisha 217 hectar ka lah dei ban hap hapoh ka category A, hynrei kaei kaba ngi lap pat ba kane ka company ka la pynhap ia kane ka project hapoh ka category I, te katkum ka EIA Notification 2006 ka la kren shai ia kane, hynrei haba iakren bad u Member Secretary u la pynshai ia ngi ba ka lah don ka jingpynkylla ia kane ka notification ha u snem 2022 ba hapoh ka 250 hectar ka dang hap ka category B,
” Kawei pat ka mat kaba kongsan kaba ka seng ka la pynpaw ka long ba hashwa ban pynlong ïa kano kano ka public hearing khamtam ha kaba ïadei bad kane ka jingtih ïa u mawshun lane kino kino ki marpohkhyndew ki dei ban don shwa ïa ka mining plan katkum ka EIA Notification, hynrei kaba ngi lap pat ba ha kane ka EIA jong ka Shree Cement ka paw ba kim pat ioh ïa ka Aproval ïa kane ka EIA Mining Plan jong ki na ka sorlar India, kawei pat ka mat kaba sngew thamula ka long ba ha ka jingshisha ka Saipung Reserve Forest ka jngai tang 4.26 kilo mitar na ka kane ka jaka kaba mut ban leh ïa kane ka project tih mawshun bad kane ka long katkum kaba paw hapoh ka kaiphot EIA jong ka Shree Cemnt ha ka jingshisha hi ba kano kano ka jaka kaba jngai hapoh 5 ne 10 kilo mitar na kine ki State Reseve Forest ki dei ban hap hapoh ki category A, te kane ruh ngi sngewphylla ba kumno ki pynhap pat ïa ka hapoh ka category B, kane ka long bad paw ba don ka jingleh buit tuh jong ki company da kaba ïadei bad ki bor sorkar bad ruh bad ki tnat sorkar bapher bapher khnang ba kin dup lait na ki aiñ ki kyndon jong ka sorkar India la ha kaba ïadei bad k mariang ne bad kino kino ki aiñ, ki kyndon jong ka sorkar India kiba ïadei bad ka jingtih mawpoh khyndew, shuh shuh lada phai sha ka Disaster Managemnent Plan jong kane ka company, ha ka jingshisha ka sorkar India ha u bnai lber 2026 ka la dep weng ïa kane ka Seismic Safty Zone ne ka aiñ ban iada na ka jingkhih jumai, hynrei kaba sngew phylla ka long ba 35 sngi hadien ba ka sorkar Idia ka la dep ban weng ïa kane ka Seismic Safty Zone kumno kane ka company ka shna ïa kane ka DMP (Disaster Management Plan) hapoh kata ka aiñ kaba la dep weng te kane ka la pynsngew lyngngoh shikatdei ïa ka seng, te ngi la ai ïa ka jingthoh sha ka MSPCB bad ai copy ruh sha ka SEIAA bad sha ka Ministry of Environment, te katkum ka jingpaw ha ka EIA jong ka Shree Cement ki la kdew shai ba kane ka 217 hectar ka dei ka khyndew kaba shrah kaba khlem kano kano ka jingjurip ne khlem ka jingtest, te ngi la pyntip ruh sha ka tnat Ministry of Environment jong ka sorkar India kaba dei peit ïa ka thaiñ satei lam mihngi ba kin peit bniah bha ïa ki jingthoh kiba ngi kum ka seng ngi la buh, te na ka liang ka seng ngi kwah ban phah ïa ka khubor kaba shai sha ki paidbah bad sha ki nongshong shnong jong ka jylla Meghalaya ba myn ha kane ngi dang iohi ïa ki pulit ba ki la pynlong ïa ka jingkhynra ïa ki nongñiah kali kiba pynkheiñ aiñ hynrei ka ka jingkylli mynta ka mih ba haduh katne ki jingpynkheiñ aiñ ka company Shree Cement ba la pynkheiñ ïa ki aiñ ki kyndon iada mariang, ka jingkylli kaba ngi buh hakhmat ka sorkar ba aiu pat phin leh halor kane? Ha ka jingshisha kine ki tnat sorkar ki dei tang ki nongtrei ka sorkar bad ngi kyntu ruh ïa u Myntri ba dei peit ïa ka mariang ba la bat da u myntri rangbah ka jylla, Conrad Sangma ba un leh eiei halor kane, lada ïa ki rit ki ria ki aiñ ki kyndon ki treikam hynrei kumno pat halor kane, ka jingwan ka Shree Cement naduh ba nyngkong ka long beaiñ namar naduh ba sdang ngi la pynpaw sha ka sorkar ïa ka jingpynkheiñ ka Shree Cement ïa ka Land Transfer Act hynrei haduh kine ki sngi ngi iohi ba ka sorkar jylla ka dang sngap jar jar halor kane ka mat bad dang ha kine ki sngi ba la dep ngi iohi ba ki nongshong shnong ki la buh ki jingunjor sha kylleng ki tnat treikam ka sorkar ban pynpaw ba kane ka jingthmu ban pynlong ïa kane ka 217 hectar ka long khlem da ioh jingbit na ki trai jaka, te mynta shano ngin phai haba ki tnat treikam kim patiaw eiei ïa ki jingujor, mynta ka jingkylli kaba khraw bah ka mih lada ka srkar kam treikam lada ki tnat treikam kim treikam eiei, te shano ngin phai, laitnoh sa tang ban shu ujor noh sha ka ïingbishar ba shalor ka Meghalaya High Court ba donburom, te ngi kum ka JNC ngim ju kham buh ujor than sha ïingbishar hynrei lada ki jingkhang jong ki tnat treikam ka sorkar jylla haba wat la ngi la dep pyni shai kdar lyngba ki sakhi kiba biang sha ka sorkar jylla ban pyni ïa ki jingpynkhieñ aiñ, te lada ka sorkar jylla ka dang sngap jar ngim banse ba ngi hap ban tied jingkhang noh sha ka ïingbishar High Court bad kaba ngi kwah ban ban jur ïa ka sorkar jylla ba naduh mynno ba ïa ki kot ki sla kiba la pdiang ne aprove ha Gujarat kin pdiang ha Meghalaya? Kane ka dei ka jingkylli kaba ngi buh hakhmat u Myntri rangbah ka jylla, uba dei ruh u myntri ba dei peit ïa ka Environment ba un pynshai ym sha ngi ka seng hynrei ba un pynshai sha baroh ki paidbah jong ka jaitbynriew hi baroh kawei”
Ngi kwah ruh ban phah ka khubor sha ki trai jaka, wat ju die tat dor ïa ki jaka jong phi, ngi dang ioh jingtip ba ka jingthied ïa ki jaka ba 217 hectar ka long tang ha ka dor jong ka khyndew, hynrei ki nongshong shnong jong kato ka shnong ki klet pat ba kane ka company ka thied ïa ki jaka namar ka donkam ïa u marpoh khyndew uba dei u mawshun ne mawrasong uba don ha kito ki jaka, hato une u maw um don dor mo? U Blei u la kyrkhu ïa ngi da ki marpohkhyndew kiba bun jait hapoh East Jaiñtia Hills District bad hapoh ka jylla hi baroh kawei, te ngi kyntu ïa ki paidbah ba kim dei ban shu die tat dor ïa kine ki marpoh khyndew kiba u Blei u la ai, namar ngi tip ba ka jingthied jaka ki company khamtam ki jaka kiba don u marpohkyndew ka long la kumba thied jhur ha ïew namar mynta wat ban thied jaka tang ban shna iing, ngi hap ban thied da ki hajar tyngka 1 sq ft, hynrei mynta lei katno tam ka dor jong uto u mar, ngim dei ban shu kmen khlem ka jingiohi jngai, namar lada ngi hi ngi long trai ïa ki marpohkhyndew katno kan kyntiew ïa ka kamai kajih jong ki para doh para snam jong ngi, hynrei kaba pynsngewsih ïa ngi ka seng ka long ba bunsien ka din ka jingshah ialam bakla ha ki briew kiba wan na bar, te ngi kyntu ïa ki paidbah ba kin pyrkhat sani hashwa ba kin die tat dor ïa ki jaka jong ki bad kyntu ïa ka sorkar ban leh eiei halor kiei kiba ka seng ka la kdew bad pynshai” ong u bah Sambormi Lyngdoh.