Pynpra ki pulit ïa ka kynhun tuh pisa ATM ba shyrkhei, kynthup ha Bhoirymbong, shah kem 6 ngut

Nongpoh, Iaiong 29 : Tang hadien ka jingshah kyndang jubor jong ka ATM mashin jong ka Meghalaya Cooperative Apex Bank Ltd. Bhoirymbong Branch kaba don ha Ri-Bhoi District ha ka 5 tarik u Ïaiong 2024, kaba la pynsuba jur ruh ka jingdon jong ka kynhun runar kiba na shabar ka jylla ki pulit ka Ri-Bhoi mar mar kila register ïa ka case ha Umiam Police Station hapoh ki kyndon jong ka Bharatiya Nyaya Sanhita (BNS) bad naka liang u Superintendent of Police ka Ri-Bhoi u la thaw ïa ka kynhun tohkit kaba kyrpang bala lam khmat da u Additional Superintendent of Police (Crime), Ri-Bhoi hapoh ka jingpeit bñiah da u DIG (Eastern Range), Shillong hadien ka jingsuba jur ba ka lah ban don ka jingdonkti ki briew na shabar ka jylla
U SP ka Ri-Bhoi u Giri Prasad u la pyntip ba lyngba ka jingïatreilang bad ki pulit ka Assam bad Haryana, ki pulit ka Meghalaya ki la lah ban pynpra ïa ka kynhun runar kaba don jingïadei bad shibun ki kam tuh pisa ATM ha kylleng ka ri. La suba ba kane ka kynhun ka donkti ruh ha ki jingjia kiba la jia dangshen ha ki district bapher bapher jong ka jylla kum ha Ri-Bhoi, East Khasi Hills, East Jaintia Hills bad North Garo Hills.
Haduh mynta, 6 ngut ki briew la dep ban shah kem halor kane ka kam. Katkum ka jingïathuh jong ki pulit, kine ki kynhun gang ki ju kyndang ïaki ATM bad ot da ka gas bad rong ïaka pisa tang haki khyndiat por ha kaba ki ju leit ban kyndang ïaki ATM kiba don kham sha kyndong.
Na ka liang u SP ka Ri-Bhoi u la ïathuh ruh ba kane ka kynhun ka long kaba la tbit bha haki kam kyndang ATM bad ka jingtohkit ka dang ïaid shakhmat ban lap shuh shuh ïa kiwei pat kiba donkti lang ha kane ka kynhun.