Ïap 4 ngut, mynsaw 5 ngut bad shah ktah haduh 4989 ngut ba lyngshop ha ki bor ka mariang

Shillong, Ïaiong 29: Kumba saw ngut ki briew kila khlad bad san ngut pat kila mynsaw ha ki jingjia ba shah lyngshop ha ki bor ka mariang ha kylleng ki jaka jong ka jylla Meghalaya.
Katkum ki data na ka disaster management authority, naduh ka shi tarik haduh 28 tarik u Ïaiong kiba la shah ktah ki don haduh 4989 ngut, 875 tylli ki ïing kila shah pynjot na ki 391 tylli ki shnong jong ki 27 tylli ki Block.
Nalor ka jingïap jong ar ngut ba shah ban maw ha ka shnong Mawlieh, Pynursla la ioh ingtip ba ki don sa ar ngut kiba la khlad.U wei u dei uba la tip kyrteng kum u Dayamitre Shylla uba la khlad na ka jingshah pom pyrthat ha ka shnong Umlyngsha, East Jaintia Hills katba u dang lehkai football.
Sa u wei pat u briew u dei uba na ka shnong Chidaret Ajagro ha North Garo Hills, une ruh u la ïap na ka daw ba shah pom pyrthat.Ki san ngut kiba mynsaw kidei na ka erïong.
Ki jingtei kiba la shah ktah bad shah pynjulor ki long haduh 177 tylli nalor ka jingshah pynjulor ki jingthung jingtep.