Julor lut ki jingthung jingtep ha ki thaiñ shiliang Khri ba syllad u phria ha ka taïew ba ladep

Nongstoiñ, Ïaïong 29 : Ka jingsyllad u phria uba jur ha ki thaiñ shiliang Khri ha ka taïew ba la dep ka la wanrah ïa ka jingjulor kaba jur bha ïa ki jingthung jingtep khamtam eh ïa ki jhur ki jep kum ki motor, phrisbin, kajor, motor u sying bad kiwei kiwei ki jait mar rep kiba kham jem. Halor katei ka jing julor jong ki jingthung jingtep la ïoh ban ïakren bad u bah B.Ryntathiang na ka shnong Mawïong shiliang Khri kaba hap ha ka ka Mairang C &RD Block Eastern West Khasi hills ha kaba u la ïathuh ba ha katei ka jing syllad jong u phria ki nongrep na ki shnong kiba don ha katei ka thaiñ ki la shah ktah jur bha . Utei u rangbah u la ïathuh ruh ba ki don ruh bun tylli ki ïng ba ki tin sop ki la peit thliew namar ka jing hap jong u phria.
U bah Ryntathiang u la ong ruh ba ka rep ka riang ka dei ka kam kaba kongsan tam jong ki paitbah nong shong shnong ha katei ka thaiñ bad haba wan ki jinglynshop jong ki bor ka mariang ka wanrah ïa ka jingduh kaba khraw ïa ki paitbah. Nalor ,kata u la ong ba ka sorkar ka la dei ban shimkhia bad ban thaw ki lad ki lynti ban ïarap lem ïa ki nongrep haba jia ki jinglynshop jong ki bor ka mariang.