Amlarem, Ïaïong 29 : Namar ba don ka jingtwa jong ka kynroh kaba la rim kaba don ha shilynter ka surok Amlarem-Muktapur, ka ophis Sub-Divisional Officer (Civil), Amlarem kala pyntip sha ki baroh paidbah ba kam long kaba shngaiñ ban ïaid lynti ha ki bynta u surok.
Kumta na ka liang ka ophis SDO (Civil), Amlarem kala khang pyrshah ïaka ïaid ka ïeng jong ki kali heh ha kane ka surok tad haduh ban da dep ban maramot bad pynbna ïa ka surok. Kane ka hukum ka treikam tad haduh ban da pynbna da kumwei pat.
Ha ka juh ka por la kyrpad ïa ki paidbah nongshong shnong baroh ban long kiba ïatreilang khnang ban lait na kino kino ki jingjia ba sngewsih.
