Shillong, ïaïong 29: Ka lympung ïakura jong ka State Boxing Championship 2026 kan khreh ban jam sha ka sngi ba saw bad ba khatduh ha kaba la khmihlynti ïa ka jingïakhun kaba jur bha hapdeng ki rang bad thei ïakura mynta ka sngi Palei ha Mawlai Mawroh.
ïa kane ka lympung kaba saw sngi lynter la pynlong da ka Meghalaya Boxing Association (MBA) ryngkat ka jingkyrshan jong ka tnad ïalehkai jong ka Sorkar jylla Meghalaya. Kane ka Championship ka kynthup ïa ki kyrdan bapher bapher ba la phiah katkum ka rta na ka bynta ki khynnah shynrang bad kynthei, ha kaba kyrdan Junior ka long ïa ki khynnah kiba 15-16 snem, bad ka kyrdan youth na ka bynta kiba 17-18 snem, nalor kata la phiah ruh ïa ki jingïalehkai katkum ka jingkhia jong ki khynnah ba ïashim bynta.
Hynne ka sngi Balang la sakhi ïa ka jingïalehkai semifinal kaba jur bha hapdeng ki khynnah samla kiba ïaknieh ban jam sha kawei pat ka kyrdan.
Ha ka kyrdan Junior jong ki kynthei 42-44kg, ka Isawanbiang Nongsiej (West Khasi Hills) ka la pynliem noh ïa ka Elizabeth Ngamlai (West Jaintia Hills) bad ka Soyabanri Nongrang (Eastern West Khasi Hills) ka la jop pyrshah ïa ka Elishiba Marwein (Ri-Bhoi) lyngba ka rai ki nongbishar.
Ha ka kyrdan 44-46kg, ka Anisha Kharbani (EWKH) ka la pynliem noh ïa ka Pdianghun Kurbah (East Khasi Hills) bad nangta ka Nebadari Rympei (Ri-Bhoi) ka la jop pyrshah ïa ka Baiamonlang Lyngdoh (Ri-Bhoi).
Ha ka kyrdan 46-48kg, ka Evangeline Sohbar (Ri-Bhoi) ka la pynliem noh ïa ka Teresa Lamneikern (Rising Star Boxing Association) katba ka Aishisha M Mawroh (Noble Art Boxing Club) ka la jop pyrshah ïa ka Dafeen L Mawlong (EWKH).
Ha ka semifinal jong ki khynnah shynrang (junior boys) la sakhi ïa u Arush Biswa (NABC) bad u Shaniaki Shabong (EKH) kiba la jop ïa la ki jong ki jingïakhun ha ka kyrdan jingkhia kaba 42-44kg, nangta u Pyndapkupar Marwein (EWKH) bad u Damonlang Marbaniang (Green Heart Boxing Club) ki la khur jingjop ha ka kyrdan 44-46kg; bad u Freedy Marngar (EKH) ryngkat bad u Karan Sunar (RB) ki la jop ha ka kyrdan jingkhia ba 46-48kg.
Ha ka jingïakhun kaba 50-52kg, u Ryan Lyngdoh (GHBC) bad u Iaimanbha J Nongrum (EKH) ki la ïoh mad ïa ka jingjop, nangta u Arkimanbha Rimen (EKH) bad u Lewanki Pakma (WJH) ki la jam shakhmat sha ka phainal ha ka 52-54kg. Ha ka kyrdan 54-57kg u Alyn M Marak (West Garo Hills) u la jop pyrshah ïa u Baskar Gill (RSBA) katba u Chepyrkhat H Mitri (GHBC) u la pynliem ïa u Moses Singh (RSBA) ha ka kyrdan jingkhia ba 57-60kg.
La khmihlynti ba ka jingïakhun phainal jong ki kyrdan bapher bapher ha la ki jong ki kyrdan jingkhia kan long kaba jur bha katba ki khlur ïakura kiban sa wan jong ka Meghalaya kin ïakhun ha ka sien kaba khatduh ryngkat ka jingthrang ban ïoh ïa ka nam lahduh. Ha ka sngi pynhap pyrda ïa kane ka Championship yn wan kongsan da u MLA for Mawlai, bah Brightstarwell Marbaniang.
