Lyngba ka Ordinance urlong ka jingthrang ki paid Khasi, Jaintia bad Garo yn thaw sa tang ki aiñ : Dy CM

Shillong, Iaiong 28 : Ka Sorkar Jylla kan sa shna shen ïa ki aiñ ki kyndon ban pyntreikam ïa ka Meghalaya Official Languages Ordinance, 2026, kaba ai jingithuh ïa ka ktien Khasi bad Garo nalor ka English kum ka Official Language, pyntip u Symbud Myntri Rangbah ba khmih ïa ka Parliamentary Affairs Bah Prestone Tynsong ha ka sngi Ba-ar.
“Naduh ka Sorkar MDA-I bad mynta ka Sorkar MDA-2, ngi lah shim ïa ki rai kiba kongsan bad ban sah khana ha ka histori ha ka jingïaid lynti ban shakri ïa u paidbah bad kawei na ki ka dei kaba dang shen, ngi lah shim ïa ka rai ban pynurlong ïa ka jingangnud u paidbah ka Jylla baroh kawei, la ka dei ki Garo, la ka dei ki Khasi bad Jaintia” ong u Bah Prestone haba ïakren bad ki nongthoh khubor.
U ong ba ka Sorkar ka la jied ban shim ïa ka ktien “Official” ha ka jaka jong ka “Associate Official”.
“Haba kut haba ngi shim ïa ka rai, ngi shem ba hooid balei ban ai Associate Official bad balei ym dei beit beit da ka Official ha ka jaka ka Officiate…kumta ngi la shim rai ba ka dei ban ïaid Official Language Ordinance” ula ong.
U Bah Prestone ula pynthikna ba kane ka Ordinance ka la ïoh ïa ka jingmynjur na u Lat bad mynta ka la dei ka aiñ.
“Nga sngewkmen ban pyntip sha phi ba hynnin ka sngi, u Lat ula ai jingmynjur ïa ka Meghalaya Official Languages Ordinance, 2026 bad lah dep ban pynmih ha ka Gazette ka Meghalaya bad ka la treikam bad mynta shen ngin sa pynkhreh ïa ki aiñ jong kane ka Ordinance bad khadduh ngin sa sdang ban pyndonkam ïa kine ki ktien ha ki kam Sorkar” ula pynbna.
Haba kylli halor ka lynti ban pynlong aiñ, ula ong “Hooid, ïa kane ka Ordinance yn sa rah sha ïing Dorbar Thaw Aiñ ban pynlong aiñ ha u bnai Nailar-Nailur ha ka Dorbar Synrai ban wan”.