Nongpoh, Ïaiong 27: Ha kum kane ka por ba jur ka jingkyrduh gas ban shet jingshet ba bun ki longiing ki mad jingeh kaba khraw ban ioh ïaki tyndong Gas namar bym don naduh jaka sam, khamtam ha Ri-Bhoi District, uwei u bar jylla u la wan ban pynïaid beaiñ ïaki tyndong shet jingshet haka shnong Baridua ha Ri-Bhoi District.
Ïa katei ka jingpynïaid beaiñ ïaki tyndong gas ban shet jingshet la lap da ka seng FKJGP Baridua Circle hadien ba kila pynlong ka jingkhynra mynta ka sngi ïaka Tapadar Gas Agency hapoh ka jingïalam u Bah Micky Lyndem, Vice-President, Samla Starwell Majaw, Asst General Secretary lem bad u Sanju Shakwa, Organising Secretary kaba dei ka Agency naka jylla Assam, hynrei kila pynïaid beaiñ pat sha katei ka thaiñ da kaba die beaiñ haka dor kaba heh khlem da ïaid lyngba ki card.
Ha katei ka jingleit khynra ka seng u trai katei ka Gas Agency u la phet krad na katei ka jaka tang mar sien iohi ïaki nongïalam ka seng.
Naka liang u samla Starwell Majaw Asst. General Secretary ka seng u la ong ba ka daw bala pynlong ïaki nongïalam ka seng ban leit khynra ka dei hadien ba kum ka seng kala ioh shibun ki jingujor naki paidbah nongshong shnong, ha kaba katei ka gas Agency kala shu die beaiñ sha ki paidbah haka dor kaba heh katba kiba ap lyngba ki card kim ioh satia.
U la ong ba naka liang ka seng ka pyrshah jur ïa ka jingleh katei ka Gas Agency naka jylla Assam kaba wan ban die beaiñ pat sha ka jylla Meghalaya bad halor katei naka liang ka seng kala kyrpad ruh sha ki bor pulit bad bor district ba kin shimkhia ban khang khyrdep syndon ïa katei ka jaka sam gas beaiñ ha Baridua.
