Kyntu ka ophis District Health Society EJHD ban peitngor ïaka jingpang ñiang pyrsit

Jowai, Ïaïong 26: Ka ophis u Deputy Commissioner cum Chairman, District Health Society, East Jaiñtia Hills District, kala bthah ïa baroh ki tnad sorkar ki dei ban peitngor bha, da kaba ai jingtip sha ki paidbah ha kaba ïadei bad ka jingkhanglad naka jingpang ñiang pyrsit hapoh ka District.
Kane ka jingbthah ka long hadien ba ka tnad National Health Mission, Meghalaya, kala pynsngew halor ka jingpur jong kane ka jingpang khlam naka ri Bangladesh khamtam kaba buh jingma ïa ki Distrik kiba don ha khappud. Kumta la kyntu ïa baroh ki tnad ba kin long kiba peitngor bad ban pynthikna na ka jingsaphriang jong une u khñiang jingpang.
Kino kino kiba don ïa ki dak ki shin jong kane ka jingpang khamtam ha ki khunlung khynnah ki dei ban pyntip mardor sha ka jaka sumar kiba jan tam, ha ki ANM ne ki ophisar jong ka koit ka khiah na ka bynta ban ïoh jingïarap haka por kaba biang.
La bthah ïaka tnad pule puthi bad ki nongtrei jong ka ICDS ba kin leit ai jingtip ban pynthikna lada lap ïa ka jingpang ha ki skul ne haki Anganwadi Centre. La kyntu ban don ka jingïatreilang kaba jan bha bad ka tnad ka koit ka khiah ne ki tnad ba dei peit khnang ban pynstet ïa ki lad jingsumar.
Kino kino ki khynnah kiba suba ba don ïa kane ka jingpang ki dei ban kiar na kaba leit sha ki skul ne sha ki Anganwadi Centre tad haduh ba kin da koit pura. La kyntu ïa ki kmie ki kpa bad ki nongsumar ba kin buh kyrpang ïa ki khynnah ha ki ïing ki sem bad ban wad jingsumar kloi katba lah.
Na ka liang ki bor District kila kyrpad jur ïa baroh naduh ki nonghikai, ki nongtrei Anganwadi bad ki paidbah nongshong shnong ba kin don ka jingïatreilang shitrhem ban ai jingtip ïa kiba suba don ïaka jingpang khnang ban ïoh ka jingïada ba pura.