Shillong, ïaïong 27: Ka Mawlai Sports Club ka la sdang ïa ka jingïalehkai ba nyngkong jong ka ha ka Group A ha ka lympung I-League 3 da kaba pynliem noh ïa ka Sikkim Brotherhood da 3-1 kol hynne ka sngi Nyngkong (27 tarik ïaïong) ha madan Khuman Lampak Stadium ha Imphal.
Hadien ka jingïakhun kaba khlem kol ha ka kylla step, ka Mawlai ka la khie im lyngba ka kol jong u Wadshwa Latoo (51′) tang hadien 6 minit ba la ïaid ka kylla miet. Nangta u Basuklang Bina u la bynrap sa ar tylli ki kol ha ka minit kaba 61 bad 75 kaba la pynjlan bad pynskhem shuh shuh ïa ka kol lamkhmat jong ka Mawlai da 3-0 ha katei ka por.
Ka Sikkim Brotherhood ka la ïohlad ba kan pynphai shi kol lyngba u Sourav Biswas (76′) hynrei ka Mawlai ka la pynthikna ban pynkut ïa ka jingïalehkai ryngkat ki lai point ba pura.
Da kane ka namjop, ka Mawlai mynta kan phaikhmat sha ka jingïakhun ka ban wan pyrshah ïa ka Sunrise Club Odisha lashai ka sngi Balang (29 tarik ïaïong) ha ka por 9 baje mynstep ha kajuh ka jaka.
Ka kynhun ïalehkai jong ka Mawlai ha kane ka jingïakhun:
Lambhamiki Lamare (GK), Arkibor Makhroh, Shariwell Lyngdoh (sub Arkini Laloo 74′), Verjelous Shylla, Damanbhalang Chyne, Robertson Khongriah, Wadshwa Latoo, Samlang Rympei, Ricky Chyne, Fairming Suting, Basuklang Bina (sub Vincent Shyrmang 90’+4)
