Ym don jaka shuh ban trei ha AAP, ong u Chadha hadien ba pynïasoh sha ka BJP

New Delhi, Ïaiong 25 : Ki nongïalam kiba mih noh na ka Aam Aadmi Party (AAP) ki la kam ba ka jingmih noh jong ki na ka parrty kadei namar ka jingsngewsih bad ka jingbym don shuh ka jingïadei kaba la nang jur ha katei ka party, ong u dkhot jong ka Rajya Sabha u Raghav Chadha ha ka sngi Saitjain, shisngi hadien ba ma u ryngkat kiwei pat ki hynriew ngut ki MP la pynïasoh noh sha ka BJP.
Shuh shuh u la kynnoh ba uwei pa uwei u riew ieit ri ba shisha kiba la pynsan pynrangbah ïa ka AAP da kaba aiti lut ïalade da ka jingkyrmen kaba khraw ki la dep mih noh na ka seng ne ki dang don mynta ha ka jingthmu ban mih noh.
U Chadha u la kam ba uwei pa uwei u briew uba hok bad uba trei shitom mynta u sngew ba “ym don jaka shuh ban trei ha ka AAP” bad ba ka seng ka ïaid ha ka lynti kaba bakla kaba ym don mano mano ba kwah ban dang ïadei bad ka.
“Dei namar kane, ki nongïalam ki la nang mih noh na ka seng uwei hadien uwei pat”, la ong u Chadha.
Shwa kane ka AAP ka la kynnoh ba dei ka BJP kaba khring ïa ki nongïalam jong ka bad ha kajuh ka por ka la kynnoh ruh ba kitei ki 7 ngut ki MP kiba ieh noh ïa ka party ki dei ki bym sngewnguh. Ha kajuh ka por ka byrngem ruh ba kin sa dawa ba dei pynduh noh ïa ka jinglong nongmihkhmat jong ki.
Hynrei na ka liang u Chadha u la ong ba ki MP ki mih noh na ka AAP ha kajuh ka por ryngkat namar ba ki ngeit ba ka mynta ka rukom treikam kam long shuh kaba beit bad kaba sngewtynnad ban ïatrei lang ha ka rukom kaba shai.