Phiah ka Mawlai SC ïa ka kynhun ban shim bynta ha ka lympung I-League 3; 50 hajar noh synñiang u President ka MFA
Shillong, ïaïong 25: Ka Mawlai SC kan shañiah tylli ha ka kynhun kaba don 14 ngut ki nongïalehkai ryngkat bad ki nongpynïaid na ka bynta ka jingïakhun jong ki ha ka lympung I-League 3 kaba nyngkong eh jong ka klob, ka ban sdang ha Imphal lashai ka sngi Nyngkong.
Ka Mawlai ka dang ïakhun mynta ha ka 5th Meghalaya State League; ki la jop ïa ka nam lahduh ha ka sienjam kaba saw ha u snem 2024-25, kaba la pynlah ïa ki ban long kiba bit ban shim bynta ha ka I-League 3 jong ka All India Football Federation.
Ka klob ka la kyrpad ïa ki nongpynïaid jong ka MSL ban ïa pyrkhat lem ïa ki tarik ïalehkai jong ki hynrei ka Meghalaya Football Association kam shym la lah ban pynslem namar ba ka MSL ka hap ban pyndep ha kaba kut jong u bnai Jymmang khnang ban ïahap ïa ka por ba la buh na ka bynta ka samoi ïalehkai I-League 3 ban wan.
Kumta ka kynhun ïalehkai jong ka Mawlai kan hap ban phiah arliang, ha kaba 14 ngut ki nongïalehkai kin leit sha Imphal hapoh ka jingïalam u bah Hering Shangpliang kum u head coach. Nangta ki dkhot ba sah kin bteng ïa ka MSL hapoh ka jingïalam u assistant coach bah Dapmon Tariang.
Ha ka sngi Thohdieng, u President ka MFA Bah Hamletson Dohling u la ïoh ban ïakynduh ïa ki rangïalehkai jong ka Mawlai Sports Club ban kitbok kitrwiang ïa ki shuwa ban kin mih ban leit sha Imphal na ka bynta Ka I-League 3 2025-26, ha kaba u la noh synñiang 50 hajar sha ka klob.
Haba ai jingkren u Bah Hamlet u la pynpaw ïa ka jingsngewkmen ban ïadon lang bad ki nongkitkam ka Mawlai Sports Club hapoh ka jingïalam u President bah Marcel K bani, bad u la kyrmen ba ka Mawlai kan khur ïa ka jingjop.
“Nga ai khublei bad kitbok kit rwiang ïa baroh ki rangïalehkai ba kin leit da kaba suk ba saiñ bad ruh ba kin ïalehkai bha. Nga kyrmen skhem ba Mawlai SC kan ïoh ban rah ïa ka nam jong ka jingjop ha kane ka aïom I-League 3,” la ong u bah Hamlet.
“Ka jingkhublei ïa ka MSC kaba la shimkhia bad trei shitom ban pynbit pynbiang ïa ka kynhun bad kyrpang ïa u bah Hering Shanhpliang head coach” u la bynrap.
Ka Mawlai kan aireng pyrshah ïa ka Sikkim Brotherhood FC (27 tarik ïaïong), Sunrise Club Odisha (29 tarik ïaïong), ARA FC (03 tarik Jymmang) bad ïa ka FC Raengdai (05 tarik Jymmang) ha ka Group A.
Ka kynhun ïalehkai jong ka Mawlai na ka bynta ka I-League 3:
Lambhamiki Lamare, Shariwell Lyngdoh, Arkini Laloo, Arkibor Makhroh, Ricky Chyne, Damanbhalang Chyne, Vincent Shyrmang, Samlang Rympei, Verjelous Shylla, Basuklang Bina, Fairming Suting, Robertson Khongriah, Bajiedlang Rangslang, Wadshwa Latoo.
Support staff: Hering Shangpliang, Jerry Sutnga, Dromlan Marngar.