Wer ka Synjuk ki Rangbah Shnong ïa ki Rangbah Shnong sha ka jingïalangbah ha ka 6 tarik Jymmang

Nongpoh, Ïaiong 24: Ka Synjuk ki Rangbah Shnong Ri-Bhoi District mynta ka sngi ka la pynbna paidbah ba kan pynlong ïa ka jingïalangbah ne General Council jong baroh ki Rangbah Shnong ha ka district, ban ïatai sani halor shibun ki mat kiba ïadei bad ka bha ka miat bad ka roi ka par jong ka dong Ri-Bhoi.
Haba kren sha ki lad pathai khubor mynta ka sngi ha Nongpoh, u Bah B.B. Makdoh, Chairman, ha ka jingdonlang u Bah P.B. Sylliang, Secretary, lem bad kiwei ki rangbah shnong, u la pyntip ba ïa kane ka jingïalangbah la rai ban pynlong ha ka 6 tarik Jymmang 2026 ha District Library Hall, naduh ka por 10 baje mynstep.
U la ong ruh ba kane ka jingïalang kan long ka kabu kaba kongsan ïa ki Rangbah Shnong ban ïakren bad ïatai sani halor ki jingeh bapher bapher kiba ktah ïa ki shnong ki thaw ha Ri-Bhoi District.
Kumta naka liang ka synjuk kala khot bad wer ïa baroh ki Rangbah Shnong ban ïa poi ryntih bad ban ïashim bynta lang ha katei ka sngi naka bynta ka bha ka miet ka dong Ri-Bhoi baroh kawei.