Pynlong ka ophis u DHO ïa ka District Level Horticulture Show ha Nongpoh

Nongpoh, Ïaiong 24: Ka ophis jong u District Horticulture Officer ka Ri-Bhoi District hapoh ka tnad Agriculture & Farmers Welfare mynta ka sngi ka la pynlong ïa ka ïew pyni nam ïa ki mar rep ba la pynmih da ki nongrep ka them Ri-Bhoi, ha ka District Level Horticulture Show kaba la long ha Parish Hall, Nongpoh.
Ha kane ka ïew pyni nam, u Bah Mayral Born Syiem, MLA ka Nongpoh, u la wan kum u kongsan. La donlang ruh ka kong B. Ranee, Additional Deputy Commissioner ka Ri-Bhoi District, u P. Dutta, District Horticulture Officer, ka kong Serolyne Chyne, District Agriculture Officer, bad kiwei kiwei ki heh ophisar, lem bad spah ngut ki nongrep na kylleng ka them Ri-Bhoi kiba la wan ban shim bynta.
Haba kren ha kane ka sngi, u Bah Mayral Born Syiem u la ai mynsiem ïa ki nongrep, da kaba ong ba ka sorkar ka don ha syndah jong ki ban kyrshan ïa ka kam rep. U la ong ruh ba haduh u snem 2027, ka sorkar ka la mang haduh 1710 klur tyngka na ka bynta ka rep ka riang, ban kyntiew ïa ka jingim jong ki nongrep ha ka jylla ban pynthikna ba ki nongrep kin ïoh ïa ka jingmyntoi bad jingïarap kaba pura.