Khlad kynsan u rangbah u ba ju pyrta ban ïada ïa ki sim kbeit Amur Falcon

Nongpoh, Ïaiong 23: Uwei u rangbah naka shnong Byrsiej, Ri-Bhoi District bala tip kyrteng kum u Bah Alos Nongpoh u ba long ruh uwei naki riew ïeid mariang, u riew trei mon sngewbha u ba ju don bynta ruh bad ki nongrep bad u ba ju pyrta ban ïada bad ban nym dei ban ktah ne pyniap ïaki sim kbeit Amur Falcon kiba ju wan dem shisien shisnem haka thaiñ Tyrso u la khlad noh na kane ka sla pyrthei haka 22 tarik Ïaiong 2026 hadien ba u la kyllon kynsan haka jingleit shimbynta jong u haka jingïalang ka VPP kaba la long ha Motphran haka sngi Balang.
Katkum ka jingtip bala ioh lum la ong ba utei u rangbah u la kyllon kynsan ha katei ka jingleit shim bynta jong u bad mar mar la pynkit la pynkit noh sha Dr. H Gordon Roberts Hospital, Shillong naka bynta ka jingsumar ba kyrkieh, hynrei ki doctor kila pynbna ba u la khlad noh.
Lah ruh ban kdew hangne ba utei u rangbah u ba dei ruh u Secretary jong ka Tyrso Valley Wildlife Protection Society u ju shimkhia ban sumar ïaka mei mariang bad ki jait jingthaw ba im baroh ha katei ka thaiñ, khamtam bym ju dei ban pynthud ïa ki sim kbeit Amur Falcon kiba ju waan dem shisien shisnem ha ka thaiñ Tyrso bad lyngba katei ka kynhun u ju angnud ban pynlong ïa katei ka jaka kum kawei na ka jaka jngohkai pyrthei, namar ka jingdon kitei ki sim ba la ju pynlong ruh ïaka Amur Falcon Festival ha kine ki khyndiat snem bala leit ban pynpawnam ïa katei ka thaiñ.
Ka jingleit ontep ïa utei u rangbah kan long haka 24 tarik Ïaiong haka shnong Byrsiej kaba dei ka shnong kaba u shong u sah.