Bynñiaw jur ka kompeni BRC halor ki jingshah kynthoh pyrshah

Shillong, Ïaiong 23 : Ka Badri Rai Company (BRC) ka la pynpaw ïa ka jingbynñiaw halor ki jingkynthoh kiba mih man ka por bad ong ba kane ka jingkynthoh ka dei ha ka jingduna ka jingtip kiba biang ïa ka jingtreikam jong ka kompeni bad ka jingnoh synniang jong ka ha Meghalaya.
Haba jubab halor ka jingshah kynthoh kaba ïai bteng, ki heh ka company ki la ong ba ka BRC ka dei ka company na ka thain shatei lam mihngi jong ka ri kaba ïakhun pat bad kiwei ki kompeni heh ha kylleng ka thain bad wat shabar jong ka thain ruh.
Ka la kdew ba ka jingdon jong ka kompeni na ka thain shatei lammihngi kaba ka jingtreikam ka la heh bha ka wan kum ka jingkyndit ïa ki kompeni heh kiba pawnam ha ka ri. “Ngi sngew sarong ba ngi lah ban pynmih bun ki lad ai kam i aki trai shnong bad khamtam eh ïa ki samla kiba tbit na ka thain ha kaba bun na ki kim pat ju ïoh lad mynshwa ban long kum ki nongïalam ha ki kompeni heh ba ki don ba kin lah ban pyni ïa ka jinglah jong ki,” ong ki heh na ka kompeni.
Na ka liang ka BRC ka pynpaw ruh ïa ka jingsngewkhia ba ki katto katne ki jingïakren sain pyrthei ki peit ïa ka kompeni khlem da sngewthuh shai ïa ka tynrai ne ki jingnoh synñiang jong ka. Ki la ban jur ba ki kompeni na ka thain shatei lammihngi ki long kiba lah pura ban pyntreikam ïa ki projek kiba heh da kaba sted bad janai kata ruh da kaba pyndonkam ïa ka jingtbit jong ki trai shnong.
Katkum ka jingong jong ka BRC, ka kompeni ka la ïoh saw tylli ki projek kiba heh ha Meghalaya ha kine ki lai snem ba la dep, da kaba ïakhun pyrshah da kaba shai bad ki kompeni ba heh na ka ri ha ka jingïakhlieh dor. “Ha ki katto katne ki khep, ngi la shim ïa ki dor kiba kham duna haduh 170 klur katba ngi dang pynneh ïa ka jingbha bad ka jingtreikam,” la pynpaw ki heh ka kompeni.
Da kaba ai nuksa ïa ka projek Meghalaya Secretariat, ki la ong ba katei ka kompeni ka la mih kum ka L1 bidder hadien ba ka la khlieh duna haduh 15 persen ban ïa ki kompeni na Kolkata bad Hyderabad. Ka kompeni ka la pynskhem shuh shuh ba ki projek jong ka ki ïaid katkum ka por ba la buh, kaba pyni ïa ka jingangnud jong ka ban pyndep ha ka por kaba biang.
“Ka iew jongngi ka long kaba rit bha ha ka jylla Meghalaya, ha kaba bun na ki projek la pyntreikam da ki kompeni na ka ri”, la bynrap shuh shuh ki heh kompeni. Haba ai jingtip, ki la pynpaw ba ka BRC, kaba la seng ha Dibrugarh ha u snem 1970, ka dang treikam mynta ha ki khyndai tylli ki jylla. Ha Meghalaya, kane ka kompeni ka don kawei kawei ka projek hapoh ka tnad Urban Affairs, Tourism, IT, bad ha ka tnad Pule Puthi.
Ki la pynshai ba ka kompeni kam shim ïa ki projek hapoh ka PHE bad PWD bad nyngkong eh ka ïakhun na ka bynta ki kontrak kiba palat ïa ka 100 klur. “Ngi kiar da kaba sngewthuh na ki projek kiba kham rit ban ailad ïa ki kontraktor trai jylla ban ïashim bynta ha ka jingïathep kyrteng,” la bynrap shuh shuh ki heh kompeni.
Haba pynpaw biang ïa ka jingkular jong ka ïa ka thain, ka kompeni ka la ban jur ïa ka jingdonkam jong ka jingïatylli bad ka jingkyrshan lang ïa ki karkhana jong ka thain. “Ka thain shatei lammihngi ka dang don ka jaka kaba kongsan ban kdup ha ki jingtei bad ka jingroi.Ka jingpynkupbor ïa ki kompeni trai ri ka long kaba donkam bha ban ïoh ïa kata ka jingkiew,” la ong ka BRC.
Ki heh ka kompeni ki la pyntip ruh ba ka kompeni ka ai kam shibun ïa ki samla trai ri, kynthup ïa palat 50 ngut ki sama Khasi ha ki kam naduh project manager sha ki nongtrei ha ophis kum shi bynta ban plie lad lang ïa ki ha kitei ki jait kam.