Haduh 70% ka dohkha thied na Assam, ki jingbam ban bsa ruh ki long kiba remdor: NFDB

Shillong, Ïaïong 23: Ka National Fisheries Development Board (NFDB) ka la pyntip ba kan don ka jingïakynduh lang jong ki nongri dohkha kaba ar sngi ha Guwahati ha ka 12 bad 13 tarik u bnai Jylliew, 2026 na kane ka thaiñ shatei lamihngi ka Ri India, ïa kane ka jingïakynduh la ai kyrteng kum ka Aquaex Northeast 2026.
Haba kren sha ki lad pathai khubor ha ka sngi Palei ha Shillong Press Club u Rajnish Kumar u nongkhot ïa ka NFDB u la ong ba ka jylla Meghalaya kam pat lah ban pyndap dohkha nalade ka dang hap ban thied na kiwei ki jylla na Andra Pradesh bad Assam.
U la ong ruh ba ki briew ha kane ka thaiñ shatei Lammihngi ka Ri India ki sngewtynnad ban bam ïa ki dohkha kiba dang im bad kumba ka long mynta ki jylla kane ka thaiñ 70% ka dohkha ki thied na ka jylla Assam bad ka jylla Meghalaya ruh kumjuh.
U la ïathuh ruh ba ka jingeh jong ki nongri dohkha ha kane ka thaiñ ka long ba ka dor jingbam ban bsa ïa ki dohkha ka rem bha ban ïanujor bad ka jylla Andra Pradesh, ka jinglong ka suiñ bneng ruh ka ïahab bha ban ri dohkha ha katei ka jylla.
La ong ba ha kane ka jingïakynduh kaba ar sngi ha Guwahati kan long ka jingkyrkhu ïa ki paidbah kane ka thaiñ shatei lammihngi ka Ri India namar ha kane ka jingïakynduh yn sa pynshai paidbah ba kumno lah ban ïoh ïa ki jingbam dohkha kiba wan hi na ka mariang da kaba pyndonkam ïa ka eit masi bad kiwei kiwei pat ki jingdonkam.