Shillong, Naitung, 15: Ka Hynniewtrep National Youth Movement (HNYM) ha ka sngi Balang jong ka 13 tarik ka la dawa na ka sorkar jylla ba kan wanrah da ki aiñ ki kanun kiban pynthikna ba ki kam ha ki private sectors kin bhah kyrpang da 80% na bynta ki samla trai muluk.
Haba kren bad ki lad pathai khubor u Bah Louis Dohtdong u President jong ka HNYM u la ïathuh ba na ka liang ka seng ka la pynher da ka shithi sha u Myntri Rangbah ka jylla ha ka 1 tarik Naitung halor kane ka jingdawa hynrei kat haduh mynta na ka liang u Myntri Rangbah bad ka sorkar kim pat ai jubab eiei ruh halor ka shithi jingdawa jong ka seng.
U Bah Louis u la ïathuh ba ka jingkyrduhkam ki samla wad kam ka tam duh mynta ka kynti bad na ka liang ki sorkar kiba rim bad ba mynta kim ju don kano kano ka jingpyrkhat bad ka thong ban seng kam thymmai na bynta ki samla ha ka jylla.
“Ngi ïohi da kaba shai ba ki kam sorkar ki la duna bha bad ka sorkar kam lah satia ruh ban pynmih kam thymmai na lade na kata ka daw ngi dawa ba ka dei ban wanrah da ka aiñ ba ki trai muluk ki dei ban ïoh 80% ki kam ha ki Private sectors” ong u Bah Louis
Shuh shuh u la ong ruh ba ki kam ha ki private sectors ki don ka jinglah ban ai kam ïa shibun bah ki samla trai muluk tangba i kumba kim kwah ai kam satia ïa ki trai muluk.
U Bah Louis u la ong ruh ba dang shen ki sorkar ha kiwei pat ki jylla ki wanrah da ka aiñ ban bhah kyrpang ïa ki kam na bynta ki trai muluk kum ha Haryana kaba ki mang 75%, Andhra pradesh 75%, Karnataka 75%, Madhya pradesh 70% and Maharashtra 80% ha ka jylla jong ki.
“Ka sorkar jylla ma dei ban bud ïa nuksa na kiwei pat ki jylla ban pyntreikam ïa kum kine ki aiñ khnang ban teh lakam ïa ka jingkyrduhkam jong ki samla trai muluk. Ka dei ka jingdonkam kaba kyrkieh ruh ba ka sorkar jylla kan pynmih ki kam thymmai ha ki tnad jong ka bad ban mang ruh da kaba wanrah ïa ki aiñ ba 80% ki kam ha ki Private sectors kin dei ïa ki samla trai muluk” u la bynrap
Ha kaba ïadei bad kane u la ïathuh ba ka HNYM jan pynlong ïa ki jingïalang ha ki 7 tylli ki district ban pynshai dha ki samla ïa ka jingdonkam ban bhah kyrpang da 80% ki kam na bynta ki trai muluk. Shuh shuh u la ïathuh ba ka seng kan pynlong da ka jingïalang ha ka 27 tarik Naitung ha Motphran ban kren bad pynshai paidbah halor kane ka kam.
