Pynwai noh ka ïingbishar HC ïa ka PIL halor ka surokbah Green Field High Speed Corridor na Ri Bhoi sha Silchar

Shillong, Iaiong 22 : Ka ïing Bishar High Court jogka jylla ha ka sngi Ba-ar, ka la pynwai noh ïa ka mukotduma PIL ha kaba ïadei bad ka jingthmu ban shna ïa ka surok bah Greenfield High Speed Corridor lyngba ka Ri-Bhoi District shaduh Silchar hadien ba ka Sorkar Jylla bad ki bor khmih ka Sorkar Pdeng ki la kular ban buh pyrkhing ïa ki kyndon bad ki jingïada ïa ka mariang.
Ka Division Bench ba kynthup ïa ka Chief Justice Revati Mohite Dere bad Justice W Diengdoh ka la pynmih ïa kane ka hukum haba shong bishar ïa ka mukotduma PIL ba la mudui da u Pynskhemlang Sohtun pyrshah ïa ka Sorkar Jylla, Deputy Commissioner ka Ri-Bhoi, NHIDCL, bad ka Ministry of Environment, Forest & Climate Change bad ka Road Transport & Highway.
U nongmudui ula pynpaw ïa ka jingsngewkhia halor ka kam thied jaka, ka jingktah ïa ka mariang bad ka jingïajan jong kane ka project bad ki jaka kyntang kynthup ia u Lum Sohpetbneng.
Ha ka affidavit ba la ai sha ka ïing Bishar ki nongshah mudui ki la kyntait ba ïa ka jingthied jaka la leh hapoh ha National Highway Act, 1956.
“Ka bor khmih ïa ka jingthied jaka hapoh ka Act u dei u Collector/Deputy Commissioner jong ki District” ong ka affidavit ka NHIDCL haba bynrap ba u DC ka Ri-Bhoi ula pynlong ïa ka jingïasyllok kaba bniah bha bad ki Rangbah Shnong jong ki jaka ba shah ktah ha ka 11 tarik Nohprah 2024.
Ki jingeh ba la pynsngew da ki kynhun ba shah ktah haba ïadei bad ka jingpynïaid lynti lyngba ka tyllong um, ki lyngkha kba bad ki jaka rep lah mynjur ban pyllait noh, ong ka affidavit haba pyntip ba ïa ka lynti ïaid lad pynkynriah noh haba pynthikna ba ka tyllong um kan ym shah ktah bad ki lyngkha kba ruh kin duna kiba shah ktah.
Ha kawei pat ka affidavit, u Deputy Commissioner ka Ri-Bhoi, Abhilash Baranwal ula ong ba ka project ka dei halor ka jingpyntrei ïa ka surok 4-lane highway corridor ba ïaid lyngba ki 18 tylli ki shnong ha Ri-Bhoi District kata naduh ka shnong Pyllun sha Lumsohphoh” ban pynkhlaiñ ïa ka jingpynïasoh hapdeng ka Shillong-Guwahati bad Silchar.
Ula pyntip ba ka sorkar Jylla ka la ïasyllok bad ki Rangbah Shnong bad ki Shnong ban pynbeit ïa ki jingsngewkhia ba ki la pynsngew bad la don ruh ka jingleit sorjamin lang ïa ki jaka ha ka jingïadon lang ki Rangbah Shnong na ka bynta ban pynshisha ïa ki jaka, ban ïakdew pud bad ban buh jingthoh ïa u pud u sam.
Halor ka jingthied jaka, ka affidavit ka la pynshai ba “ki sienjam ba nyngkong kum ka sorjamin bad ka rai ïa ka lynti ïaid ka dei ka kam ba la leh lypa da ka Sorkar hashuwa ka jingpynbeit ïa u pud jaka hapoh ka National Highway Act, 1956.
Haba pynbeit ïa ka jingsngewkhia halor u Lum Sohpetbneng, ka affidavit u DC ka ong “Ym don khyndiat ruh ka jaka ba la ithuh kum ka jaka kyntang ka ban shah ktah ha kane ka project bad ka lynti iaid jong ka High Speed Corridor ka jngai kumba 500 meter na ki jaka kyntang”.
Haba khmih ïa ka affidavit bad ki jingbatai jong u DSGI, ka ïing Bishar ka ong ba kam lap satia ïa kano kano ka nongrim ha kane ka PIL haba khmih ïa ka jingshisha, ba ki bor khmih kila pdiang bad mynjur ban bud ïa ki SOP bad baroh ki kyndon ba hap pyndep.
Ka ïing Bishar ka pynpaw ba ki jingsngewkhia ba la pynsngew da u nongmudui ki dei kiba ai jubab mynta ka sngi bad ba ki bor khmih ki la kular ban shim ïa ka bynta ban ïada ïa ka mariang, ki wah duid, ki jaka leh niam bad kiwei kiwei bad ba kin shim ruh ia ki jingbit hashuwa ba kin pyntrei ia ka project bad ba kin ym iaid lait ia ki rule, ki kyndon ne ki jingbit.
Ka ïing Bishari ka la pynwai noh ïa kane ka mukotduma haba bynrap ba u nongmudui u long laitluid ban ujor thymmai ïa ka mukotduma lada mih kano kano ka daw ba thymmai hadien habud.