Nongpoh, Ïaiong 22: U Myntri ka tnad GAD ka sorkar jylla, u Bah Sosthenes Sohtun, u la pyntip ba ka sorkar ka la shimkhia bha halor ka jinglong jingman jong ka Meghalaya House ha Vellore, namar ka jingtei ka la rim palat bad ym lah shuh ban pynbiang ïa ka jingdonkam jong ki paidbah kiba leit shah sumar.
U Myntri u la ong ba hadien ba bun ki paidbah bad ki nongmihkhmat paidbah, kynthup ïa u MLA ka North Shillong, ki la pynpaw ïa ka jingsngewkhia, ha kaba la ioh ruh ban ïakren bad u Myntri Rangbah bad u Symbud Myntri Rangbah ban wad lad ban pynbeit ïa kane ka bynta.
“Ngim lah shuh ban shu maramot namar ka building ka la rim palat. Ngi la phah ïa ka jingtyrwa ban shna thymmai ïa ka Meghalaya House kaba kham heh bad kaba don bun kamra, ban kham pynsuk ïa ki paidbah ka jylla kiba leit sha Vellore ban shah sumar,” la ong u Bah Sohtun.
La ong ruh ba katei ka building ban sa tei thymmai kan don palat 50 tylli ki kamra, ka ban long ka jingïarap kaba khraw ïa ki nongpang bad ki bahaiing jong ki.
Haba ïadei bad ka jingtyrwa ban noh synñiang pisa T. 50 lakh na u MLA ka North Shillong, u Bah Adelbert Nongrum, u Myntri u la pynshai ba watla ka sorkar ka sngewthuh ïa ka jingsngew jong u MLA, hynrei ki kyndon jong ka Special Urban Works Programme kim shah ïa ki MLA ban pynkynriah ïa ka pisa jong ki skhim naka bynta ka constituency sha ki projek kiba shabar jylla bad naka liang ka sorkar kala phah ruh ïaka jubab sha utei u MLA halor ka jingtyrwa jong u.
Shuh shuh, ban pynbeit ïa ka jingeh ba mynta, ka sorkar ka la pyrkhat ban shim wai shipor ïa kawei ka iing kum ka jaka sah ïa ki nongpang bad ki nongleit nongwan, namar ba ka jingtei ïa ka Meghalaya House kaba thymmai kan shim por kumba ar snem eiei ban dep. Hadien ba la dep, yn sa pynkynriah noh sha ka building kaba thymmai.
