La ju pyntip lypa shwa ban pynlip bording lait noh tang haba don ki bor mariang : Metbah Lyngdoh

Shillong, Ïaiong 22 : U Myntri ba dei peit ïa ka tnad Bording, Bah Metbah Lyngdoh u la ong ba ïa ki jingpynlip bording bun kynta kiba dei ha rilum Garo Hills bad kumjuh ha kylleng ka jylla la pyntip lypa sha ki paidbah lait noh tang ha ki jingjïa lyngshop mariang kiba shu jia kynsan.
“Barabor haba ïadei bad ki jingpynlip bording, lada dei kiba la pynbeit lypa la ju pyntip shwa sha ki paidbah,” u la ong haba kren bad ki lad pathai khubor haba ïadei bad ka jingpynlip bording ha rilum Garo. Tangba, u bynrap biang ruh ba ka jingpynthut ka bording ha ka por ba don ka eriong ka dei kaba ym lah satia ban kiar.
Haba jubab pat halor ka jingpynlip bording kaba neh 7-8 kynta, na ka liang u Myntri u la ong ba kine baroh ki dei bad ka jingmaramot lane ka jingpynbha ïa ka lain bording.
“Ka jingpynlip bording 7-8 kynta ka dei tang na ka bynta ki kam kiba la pynbeit lypa namar mynta ki don bun ki skim kiba dang ïaid ha kylleng ki shnong kiba don ha ka jylla kumta kine baroh ki dei kiba la pynbeit lypa,” u la ong.
Ha kajuh ka por u Bah Metbah u la ong ba ka tnad ka don ka jingïatrei lang kaba jan bha bad ki bor synshar shnogn kynthup naduh ki Nokma ne ki Rangbah Shnong.
Katkum ka jingong jong u, kine ki skim kiba dang ïaid kin dang bteng biang sa kumba ar snem shiteng bad dei na kata ka daw la pynbeit lypa ïa ka rukom pynlip bording ha kito ki jaka ba donkam ban trei ha shwa ban sdang ïa ka kam.
Ha kane ka sngi u Myntri u la ïathuh ba mynta ki la sdang ruh ïa ka kam ba thymmai kiba dei bad ka jingpynpoi bording biang ha ki longiing.