Jynrat ka erïong ïa ka laboratory room jong ka skul CDG Secondary Upper New Nongstoiñ

Nongstoiñ, Ïaïong 22 : Ha ka miet jong ka sngi hatmajai ka 21 tarik Ïaïong ka erïong kaba jur ka la syllad ïa ka thaiñ Nongstoiñ ha kaba ka Laboratory room jong ka Christ Deciples Girls Secondary school kaba don ha Nongrim Upper New Nongstoiñ ka la pra bad ka tnum jong katei ka kamra ka la shah jynrat bad baroh kawei ka tnum ka la shah kit ha ka erïong sha kham pajih hajan jong ki ïng briew hynrei don bok ba ki don ki tynrai siej bad katei ka tnum ka la tyngkhuh bad hap noh sha madan ha kaba ki ïng briew ki la lait thaw.
Lada ym dei ba don kitei ki tynrai siej lada katei ka tnum ka hap ha ki ïng briew ka lah ban jia ka jingmynsaw ïa kiba don ha poh ïng. U nongthohkhubor hadien ba la ïoh jingtip u la leit ban peit ïa katei ka skul bad la lap ba ka jingjulor ka la jur bha.
Ha kajuh ka por la ïoh ban ïakren bad u babu D.Marbañiang u nongseng jongh katei ka skul ha kaba u la ïathuh ba katei ka eriong ka la khyrwit kynsan ha ka por kumba khyndai baje ei ei myn miet bad ka la neh tang kumba katto katne por ha kaba ka jingjulor jong kiwei pat ki ïng ki sem ka duna hynrei lada dei ba ka neh kham slem khlem artatien wat ki ïng dewbilat ruh ki lah ban pra.
Haba kylli pat ba kumba katno ka jingduh ka la kot u la ong ba lada kheiñ tang ïa kit air ki tar kiba don ha ka Laboratory rook ka jingduh ka la kot da ki bun phew hajar namar ki tiar saïans jong ka Laboratory ki la pait ban pra lut baroh khoit. U babu Marbañiang u la ong ruh ba ha kaba ïadei bad katei ka jingjia u la dep pyntip sha u Gramsevak bad BDO jong ka Nongstoiñ Block bad ruh u la dep pyntip sha ka ophis jong u Sub Divissional of School Education Officer jong ka West Khasi hills ba kin leh ïa kaba don kam.
Haba pyrshang ban wad jingtip la ka don ne em ka jing sha pynujulor ha kiwei pat ki bynta la ïoh jingtip ba ha ka shnong Siejlieh ki la don bun tylli ki ïng kiba la shah pynjulor ha ka jingkhyrwit jong ka erïong bad don ruuh kiba shu julor malu mala.
Nalor kata ha ka shnong Tiehsaw ruh la ïoh jingtip ba ki la don katto katne ki ïng kiba la shah jynrat ïa ki tin . Ha kaba ïadei bad ka jingshah ktah jong ki ïng ki sem ha katei ka erïong na ka liang ki bor district ki la dep shim jingkheiñ lut ïa baroh kat kiba la shah ktah.
Nalor kata na ka liang jong ki kynhun ai jingïarap kum ka Diastrict Disaster Mangement Team bad ki bor pynïaid district ki la kyntu ïa ki paitbah nongshnong shnong ba ki dei ban phikir bha ha kaba kum kane ka por namar ym lah ban tip ha kano ka por ka jing lynshop ka mariang ka wan jia .