Shillong, ïaïong 22: Ka kynhun ïalehkai jong ka Balmanduri FC ka la ïoh ban khur ïa ka jingjop kaba paka da kaba pynliem noh da 7-1 ïa ka Attong Matgrik FC ha ka jingïalehkai jong ka Group G ha ka lympung 5th Meghalaya State League ba la long ha Williamnagar hynne ka sngi Balang.
Kane ka dei artad ka jingïakhun ba tang kawei ka ba long hynne ka sngi jong kane ka lympung, ha kaba ka Balmanduri kaba dei ka kynhun na ki bynta jong ka North Garo Hills, ka la sdang ban ïuh kjat ha kane ka lympung da ka nam rem, ha ka jingïalehkai kaba nyngkong kaba la long myn ha ka 18 tarik mynta u bnai, hynrei hynne pat ka sngi, kane ka kynhun ka la lah ba kan mir jingmut bha ban ïoh ban khur ïa kane ka jingjop, kaba tang haduh ba kut ka kylla step, ka la lah ba kan pynkhih haduh saw tylli ki kol kiba la wan lyngba u Goodnear Marak (21′), Jurisbirth Marak (30′), Ganapati Rabha (41′) bad kumjuh na u kapten u jong ka u Chichang M Momin (45′).
Haba wan ban bteng ïa ka kylla miet, u Rabha (70′) bad u Dipunjay Rabha (75′), kiba la wan mih na ka ben shong ka jong ki ban thep pat sa ïa kine ki artylli ki kol bad u Jurisbirth u la ïoh ban thep sa kawei pat ka kol ha ka minit 81.
Na ka liang ka Attong Matgrik, ïa ka shi kol ban lait brut ka jong ka na kane ka jingïakhun la thep ïa ka da u Sunil M Marak ha ka minit kaba 85.
Lashai pat ka sngi, kan don tang kawei ka jingïakhun kaba dei jong ka Group G ban ïakhun hapdeng ka A’chik SCO Rongjeng pyrshah ïa ka Janepih YSCA kaba la buh ban long ha ka por 3 baje nohphai sngi.
