Buh jingmaham bad khang ban ïaid ki kali naduh Laitlyngkot shaduh Mawlieh bthah u ADC

Shillong Iaiong 21 : U Additional Deputy Commisioner ba dei peit ïa ka Pynursla Sub Divison ula bthah ïa baroh ki Ophisar kiba don bynta ha ka kam, ban pynïeng ïa ki jingker bad ban buh ïa ki jingmaham ha man la ki bynta jong ka surok kaba la shah kthah jong ka NH-260 bad ban pyrkhing ban ym shah rung ne ban ïaid ïa ki kali naduh Laitlyngkot shaduh Mawlieh.
“Hadien ba jia ka jingtwa khyndew bad maw ha ka 20 tarik u Iaiong ha ki bynta jong ka Mawlieh ha kaba Arngut ki mynsiem briew ki la duh noh ia ka jingim, namar katei ka jingjia, la khang ban iaid kali na katei ka surok” pynpaw u Additional Deputy Commisioner I/c Pynursla Sub Divison ha ka kyrwoh.
Namar ka jinglong jingman jong ka suiñbneng bad ka jingtih ïa ki maw bad ka khyndew ha u lum ka lah ban jia biang ka jingtwa khyndew bad hap ki maw ka ban buh ha ka jingma ïa ka jingim briew bad ïa ki jingdon jingem” la pynpaw u ADC.
Kumta ban pynthikna ïa ka jingshngaiñ ki paidbah bad ban ïada na kino kino ki jingjia ba sngewsih bad ban bteng ïa ka jingpynbna paidbah kaba la pynmih 20.04.2026 kumba la hukum ba ka surok ha ki bynta jong ka NH260 naduh Laitlyngkot shaduh Mawlieh kan ïai bteng ban khang na ka bynta kano kano ka jingïaid ki kali.
“Kane ka jingpyrkhing kan treikam tad haduh ban da lah pyndep ïa ka jingleit jurip bad ban pyndep ïa ka jingkhmih a ka jingshngaiñ da ki bor kiba dei khmih ki ban pynthikna ba ka jingshna ïa katei ka surok ka long kaba biang ia ki paidbah ban pyndonkam ne ka kaiphod kaba kdew ruh ïa ki jingai jingmut ban pynbeit” la ong ha ka jingpynbna.
La bthah ïa baroh ki ophisar kiba don bynta ha ka kam ban pynïeng ïa ki jingker bad ban buh ïa ki jingmaham ha man la ki bynta jong katei ka bynta ka surok kaba la shah ktah. Ban buh ïa ki briew ban khmih ïa ka jingïaid ki kali bad ban khang ïa ki ban rung. Ban sam ïa ki jingtip sha ki paidbah lyngba ki lad ai jingtip kiba dei.
“Ka tnad pulit, NHIDCL bad ki Kontraktor bad ka PWD (Roads) ki dei ban pynthikna ba dei ban pyntreikam pura ïa katei ka hukum. Kino kino kiba pynkheiñ kin shah pynshitom ha ki kyndon jong ka aiñ.
U ADC ula ong, ba la pynmih ïa kane ka hukum na ka bynta ka bha ka miat bad ka jingshngaiñ jong ki paidbah bad kan ïai bteng ban treikam tad haduh ban da pynmih da kumwei pat.
Shuh shuh ha ka kyrwoh, la pyntip ba ïa katei ka surok la khang ban ïaid kali naduh mynta ka miet haduh ka sngi Balang tad haduh ban da pynbna da kum wei pat namar ka jingïai bteng ban hap ki maw.
Watla kala don ka jingkhmih bniah da ka kompani ban pynkhuid ïa ka surok man la ka por hynrei ka dang bteng ka jinghap ki maw kiba thymmai bad ka la buh ha ka jingma ia ki nongïaid nongïeng bad wat ïa ki nongtrei ruh.
La kyntu ïa baroh ki nongleit nongwan ban kiar ka ïaid na katei ka jaka kaba shah ktah bad ban ïaid noh na kiwei pat ki jaka tad haduh ban da ai da kiwei pat ki jingpynbna.