Sngewnguh ka Hid Foundation ïa ka sorkar ba ithuh ïa ka ktien Khasi bad Garo kum ki ktien sorkar

Nongpoh, Ïaïong 21: Ka Hid Foundation Shillong ka la pynpaw ka jingsngewnguh bad jingïaroh kaba khraw ïa ka sorkar Meghalaya, hapoh ka jingïalam jong u Myntri Rangbah u Conrad K. Sangma, halor ka sienjam ban sdang ïa ka jingithuh ïa ka ktien Khasi bad Garo kum ki ktien sorkar ne official language jong ka jylla.
Haba kren halor kane, ka Chief Executive Officer ka Hid Foundation Shillong, ka Kong Jinysha D. Maiong, ka la ong ba kane ka rai ka dei ka sienjam kaba kongsan bad kaba wanrah jingkylla na ka bynta ki paidbah ka jylla. Ka la kdew ruh ba kum ka seng kaba la trei paidbah la palat 14 snem, ki la sakhi hi dalade ïa ki jingeh ba ki paidbah, khamtam ha ki thaiñ nongkyndong, ki ïakynduh namar ba bun ki jingpyllait khubor sorkar ki long tang ha ka ktien phareng.
Ka la ong ba bun ki nongshong shnong kim sngewthuh bha ïa ki jingpynbna jong ka sorkar, ki form bad ki skhim bapher bapher. Kumta, da ka jingithuh ïa ka ktien Khasi bad Garo, ki paidbah kin ïoh lad ban kren bad ïadei bad ka sorkar ha la ka jong ka ktien, kaba pynsuk bad pynjan ïa ka jingïadei hapdeng ka sorkar bad u paidbah.
Ka Hid Foundation ka la kdew ruh ba kane ka rai ka long kaba kongsan bha ha ka jingïada bad jingïarap ban pynneh pynsah ïa ka riti dustur bad ka jinglong tynrai jong ka jylla. Ka jingïoh jingithuh ïa ki ktien Khasi bad Garo kan ïarap ruh ban kyntiew ïa ka pule puthi ha ka ktien kmie bad ban pynjan ïa ka jingtreikam sorkar sha ki paidbah.
Ka la bynrap ba ka jingithuh ïa ka ktien ka pynsngewsarong ïa la ka kolshor bad ka tynrai ba ngi mih, ban ïada ïa ki jingtip tynrai bad ka ai bor ïa ki paidbah ban shim bynta shitrhem ha ka synshar paidbah, kan plie lad ruh ïa ka jingwad bniah, ka thoh ka tar bad ka jingroi jong ka thoh ka pule ha kine ki ar tylli ki ktien na ka bynta ki pateng ban wan.
Ka Hid Foundation Shillong ka la pynpaw biang ïa ka jingsngewnguh ïa ka sorkar jylla halor kane ka sienjam kaba kongsan, bad ka la kyrpad ruh ba dei ban bteng ïa ki jingtrei ban pynrung ïa ka ktien Khasi bad Garo hapoh ka 8th Schedule jong ka riti synshar ka ri India, khnang ban ïoh jingithuh ha ka ri baroh kawei.
Shuh shuh, ka seng ka la ai jingïaroh ïa ka Khasi Authors’ Society (KAS) halor ka jingtrei shitom bad jingïakhun kaba slem jong ka ban pynurlong ïa kane ka jingangnud jong ki paidbah ka jylla.