Kynnoh ka BJP ba pynthut ka INDIA Block ïa ka Women Reservation Bill pulom ka jingthmu sdang naduh u 2029

Shillong, Iaiong 20: U National Secretary ka BJP ba khmih ïa ka jylla Meghalaya Anil Antony ha ka Lah Sngi U Blei ula kynthoh ïa ka kynhun INDIA Bloc kaba la ïalam da ka Congress ba ka pynpulom ïa ki 3 tylli ki Bill kiba kongsan kiba la wanrah ha ka 16-18 tarik u Iaiong ha ka dorbar kyrpang jongka Parliament, kaba kynthup ia ka 131st Constitution Amendment Bill kaba thmu ban pynïakhlad ïa ka bhah ki kynthei na ka Delimitation ne ka jingphiah ïa ki Constituency.
“3 tylli ki Bill la wanrah da ka Sorkar Pdeng hapoh ka jingïalam u Myntri Rangbahduh ka ri da ka jingthmu ban pynthikna ba ki kynthei jong ka ri, kiba don palat ïa ka 50% ha ka jingbun paid kin ïoh lang ia ka lad kaba mar kumjuh bad ka jingbym noh shilliang ha ki kam kiba ïadei bad ki kam synshar paidbah” la ong u Antony.
Ula kynnoh ba ki seng saiñ pyrthei ki ialeh ban pynslem ia ki kam thaw aiñ. “Hynrei kaba sngewsih ha kine ki ar sngi jong ka dorbar, ki dkhot jong ka INDIA Block kiba kynthup ïa ka Congress, Samajwadi Party, TMC, DMK ki la pynthohbria ïa ka Bill bad khatduh eh ïa kane ka Bill kaba la wanrah da u Myntri Rangbahduh da ka jingthmu ban pynthikna ïa ka jingai ïa ka hok, ka jingbym shah liang ha ka jingïashimbynta ha ka jingjied ïa ki kynthei ban ïoh ban ïaid shakhmat” ula ong.
U Antony ula ong, ba ka rekod treikam ne ka “track record” ka Congress ka dei ban pyrshah ïa ka Bill. “Hapdeng u snem 1999-2003 haba u Myntri Rangbahduh ka ri u Atal Bihari Vajpayee, ka Sorkar NDA kala wanrah 4 sien ia ka Women Reservation Bill hynrei ka Congress ha kitei ki por ruh kala pynthikna ba kane ka Bill kam dei ban ïoh ïa ka jingmynjur hapoh ka Parliament,” ula ong.
Ha kaba ïadei bad ka 2023 Act, ula kdew ba ka dei kaba don bynta bad ka Census bad Delimitation kaba mut ban pyntreikam ha u snem 2034. “ïa kane ka dorbar la khot pynlong da ka sorkar NDA ban pynthikna ba kan ym pynïasoh bad ka Delimitation bad ban pynthikna ba ha u snem 2029 kane ka Bill kan sa urlong shisha” ong u Antony.
Ula bynrap ba u Myntri Kam Pohïing ka ri u Amit Shah ula dep ban pynthikna ïa ki jylla ha kaba ïadei bad ki jingsngewkhia a ki Seat. “U Myntri Kam Pohïing ka ri ula kdew shai ba ma u bad ka sorkar ki kloi ban don ïa kano kano ka jingpynkylla ba kin ym don kino kino ki jylla ruh ki ban duh noh ïa ki Seat kiba la don lypa ha man la ki jylla, kan don ka jingkiew kaba 50% ha ki jylla bad yn leh ha ka rukom kaba yn ym noh shilliang” ong u Antony.
“Man la ki jylla ha ka ri India kynthup ïa ka Meghalaya kin ïohi ïa ka jingkiew ha ka jingdon ki Seat ha ka Lok Sabha. Kumba long mynta ka Meghalaya ka don 2 ngut ki MP Lok Sabha hynrei ka lah dei ban don noh 3 tylli ki Seat bad kan pynthikna ba iwei na ki 3 ngut ki MP ha ka jylla Meghalaya kan dei beit ka kynthei” ula bynrap.
U Antony ula ong, ba ka Delimitation ka dei kaba la rim bah ha ka jingdon ki nongmihkhmat. “ïa u pud u sam la dep ban rai katkum ka Census ne Khanasamari kaba la dep leh khatduh ha u snem 1971 ha kaba ka jingdon ki nongshong shnong ha ka ri India ki long tang 54 Klur bad mynta ka jingdon ki nongshong shnong ka la long 140 Klur”.
Ula kynnoh ba ki seng ha ka Liang Pyrshah ki sheptieng ban pynkup borïa ki kynthei ha ka kam saiñ pyrthei. “Ka Congress bad ki paralok ki jongka ki sheptieng ba ki kynthei kin ïoh ïa ka hok ha ka histori hapoh ka jingïalam u Myntri Rangbahduh ka ri bad ba ka jingneh ka jongki kum ki seng saiñ pyrthei ka lah ban duh noh” la ong u Antony.
“Ka Sorkar u Modi kan ïakhun tyngeh pyrshah ïa kine kiba bor ka Liang Pyrshah kiba ïakhun pyrshah ïa ki kynthei. Ka por ka la dei ïa ki kynthei ki jong ngi ban pynphai kylla lyngba ka bor jong ka jingthep vote ka jongki bad ban kyndat noh sharud ïa kine bad ïa ki seng kiba leh pyrshah ïa ki kynthei ha ka jingdon ha ka kam saiñ pyrthei kaba shi rta” ula ong bad ka bynrap “Ka BJP ka pynrem jur ïa kane ka jingleh kaba khlemraiñ, ka rukom leh ka bym ïahap ha ka kam synshar paidbah jong ki kynhun ha ka Liang Pyrshah ïa kaba ngi lah sakhi ha ka 16 tarik u Iaiong hapoh jong ka Parliament.”