Pynwai noh ka ïingbishar HC ïa ka mukotduma pyrshah ïa ki 8 ngut ki KSU Mawkyrwat

Shillong, Iaiong 18 : Ka ïing Bishar High Court jongka jylla ka la pynwai noh ïa ka mukotduma ïashoh ïadat pyrshah ïa ki 8 ngut ki dkhot ka KSU Mawkyrwat hadien ba ki arliang mamla ki la poi sha ka jingiïsuk bad ïa sngewthuh jingmut.
Ha ka hukum kaba la pynmih ha ka 15 tarik Iaiong ka Chief Justice Revati Mohite Dere ka la ïohi ba la kyntu pynwai noh ïa ka mukotduma halor ka nognrim ba ki arliang mamla kata uba ujor bad ki nongshah ujor ki la apoi sha ka jingïasngewthuh jingmut bad jingïasuk.
Kane ka mukotduma ka long halor ka Ejahar ba la ujor naduh ka 10 tarik Nailar 2020 ha Mawkyrwat Police Station . Kat kum ka jingujor u Pynshngain Wanniang ba ha ka 10 tarik Nailar 2020 ha ka por 7 baje mynstep ba ki don haduh 25-30 ngut ki dkhot ka KSU kiba la wan kyrsiew thiah ïa u bad rah ïa u hapoh kali bad ïalam ïa u sha ophis ka KSU ha Mawkyrwat. Ynda la poi ha katei ka ophis ki la shoh la bom ïa u bad dien ba la dep shoh ia u ki la phah leit noh ïa u sha ïing.
Katba ym pat dep bishar ïa kane ka mukotduma kine ki arliang ki la ïakren ïasuk noh shabar ka ïing bishar bad ha ka 13 tarik Lber 2026 kine ki arliang mamla ki la rai ban ïasuk da ka jingiasngewthuh jingmut lang bad hakhmat kiba haïing hasem bad ki paralok parajor.
U nongujor uba wan mih da lade hakhmat ka ïing bishar ruh u la ai jingthoh sha ka ïing bishar ha ka 15 tarik Iaiong 2026 da kaba pynpaw ba um don kano kano ka jingpyrshah lada pynwai noh ïa kane ka mukotduma.
Kumta ka ïing bishar ruh haba ka la bishar na ka FIR ka lap ba ka jingmynsaw jong uba shah shoh ruh ka long tang malu mala kumba ka paw na ka Medical Certificate bad namar ba ki la pynpaw ba ki la ïasuk kumta ka ïing bishar ka la shu bthah ïa ki 8 ngut ba kin siew noh 10,000 tyngka sha une u nongujor bad ka ïing bishar kan sa shu shong bishar ha ka 13 tarik Jymmang ban tip la ïa kane ka pisa la dep siew ne em.