6 tylli ki mawnongrim kiba la kot 170 klur la plie ha Wahïajer

Jowai, Ïaïong 19: Ka ophis Executive Engineer PWD (Roads) Jowai Central Division, Jowai mynta ka sngi saitjaiñ 18 tarik u Ïaïong 2026 kala pynlong ïa ka jingïalang ban plie paidbah ïa ki 6 tylli ki mawnongrim kiba kynthup 4 tylli kiba la pyndep pyntrei bad 2 tylli ki ban sa pyntrei shen kiba la kot baroh sha ka 170 klur tyngka.
Ha kane ka sngi la wan ban plie ïa ki mawnongrim da u Symbud Myntri Rangbah ka sorkar jylla bah Prestone Tynsong, ha ryngkat u symbud myntri rangbah ma Sniawbhalang Dhar, u myntri ka koit ka khiah bad ka kam ïalehkai Sports ma Wailadmiki Shylla, ki MLA ma Comingone Ymbon, ma Nujorki Sungoh, ka kong Santa Mary Shylla, bah Damanbait Lamare, u Gabrial Wahlang MLA Nongstoin, u Ollan Singh Suin MLA Mawsynram, U Vijay Kumar D IAS Commissioner & Secretary Sports and Youth Affairs, ki MDC, ki ophisar sorkar bad kiwei de.
La pyntip ba kitei ki projeck bapher bapher kiba la plie mawnongrim kiba hap hapoh ka tnad PWD, PHE, Tourism, Sports bad kiwei de
Saw tylli ki mawnongrim kiba la dep pyntrei ki long ki 2 tylli ki jaka Parking naka bynta ka National Game-2027 kiba don hajan ka Multi Sports Complex Wahiajer, kaba kot 89.20 lak tyngka lyngba ka District Mineral Fund.
Ka Wahiajer Water Supply Scheme bala mang pisa hapoh ka Jal Jeevan Mission jong ka tnad Public Health Engineering Department.
Ka jingshna ïa u surok Pdein Mukhim Sohphoh Mookabeng & Kdohkule uba jrong 21.255 KM hapoh ka State Road Fund 2025-2026 haka jingmang pisa kaba 100 klur tyngka.
Bad ki kam pynroi hapoh ka Wahiajer bala bei pisa da ka sorkar jylla kaba kot 2 klur tyngka, lyngba ka tnad Directorate of Tourism jong ka sorkar jylla.
Katba ïa ki 2 tylli ki mawnongrim ki ban sa pyntrei shen ki long lyngba State Sports Council Meghalaya na ka bynta ban pynshan ïaki lait pynthaba haba por mynmiet (Lighting System of 1400 LUX) ha madan Multi Sports Complex, Wahiajer West Jiañtia Hills District haka jingkot kaba 8.94 klur tyngka.
Bad ka jingshna pynthymmai ïa ki surok barim hapoh ka 1-Nartiang Constituency kiba la don haduh 70-80 kilo miter, kynthup hapoh ka Jowai Constituency haduh 50 kilomiter ïa kaba yn pyntrei hapoh ka Central Roads Infrastructure Fund (CRIF) 2025-2026 hapoh ka jingpeit jong ka (PWD) Jowai Central Division bad ka Jowai South Division kaba la kot 20.92 klur tyngka,
Ym slem shuh yn buh mawnongrim sa ka Youth Hostel hajan ka Multi Sports Complex, Wahiajer bad sa kawei yn wanrah ïa ka project kaba heh na ka bynta ka Ummulong (CHC) kaba kot 50 klur tam na ka bynta ka koit ka khiah, la pyntip u ma Sniawbhalang Dhar.