La pynkit ïa u Chairman ka GTF sha hospital sdang shah thngan sa u Secretary General

Shillong, Iaiong 17: Ki Doctor mynta ka janmiet ki la pynkit noh ïa u Chairman ka Green Tech Foundation (GTF) Meghalaya u Bah H Bansiewdor Nonglang sha Civil Hospital Shillong.ïa ka jingshah tngan ba khlem buh por la bteng pat da u Secretary General u Ritre Lyngdoh.
Kane ka wan hadien ba ki Doctor ki la eksamin ïa u Bah Bansiewdor haka jaka ba u pynlong ka jingshah thngan ha Madan Malki.
U Bah Bansiewdor ula sdang ïa ka jingshah thngan khlem pud sngi naduh 8 tarik Iaiong ha Madan Malki ban pyrshah ïa ka project jong ka tnat Tourism ha dewlynnong Lumpongdeng Umiam.
Hashuwa ban rung sha Emergency Centre jong ka Civil Hospital u Bah Bansiewdor ula ong “Wat khuslai na ka bynta jong nga, khuslai na ka bynta ka Umiam bad Lumpongdeng, lada ngim lah ban ïoh biang ïa ka Umiam bad Lumpongdeng, kan dei ka jingïaleh ba rem jong ka jaidbynriew, lada ngi jop, ngin long trai biang ïa ka Umiam bad Lumpongdeng”.
U Bah Bansiewdor ula ong ba kum u nongïalam ula leh katba lah hynrei ula ong ba ki paidbah bad nongïalam ka GTF kim shah shuh ïa u ban shong shah thngan ha Malki.
“Nga tharai phim kwah ba ka jingiap jong nga kan dei ka jubab ïa ki mynder bad ki myndie ri kiba don ha Secretariat. Phi kwah baka jingjop jong ngi kan dei hi ka jubab” ula ong.
“Pynjur ka jingduwai bad leh ïa ka ba donkam, pyndap ïa ka madan Malki” ula bynrap.
Shuh shuh u Secretary General jongka Green Tech Foundation u Ritre Lyngdoh u la sdang mynta ka Sngi Thohdieng ïa ka jingshah thngan ba khlem buh por tang hadien katto katne por ba la pynkit noh ïa u Chairman ka GTF sha Civil Hospital hadien ba u la kem tlot na ka jingshah tngan ba u la bteng lynter 9 sngi. Ka GTF ka pyrshah jur ïa ka jingai wai jongka sorkar ïa ka Lumpongdeng sha ka Taj Group haduh 60 snem na ka bynta ban pynitynnad bad pynbha ia ka kum ka jaka jngohkai.
“ Ka jingkoit jingkhiah jongu Chairman ka la hiar bha hadien ka jingshah tngan ba khlem buh por la 9 sngi mynta bad kumta ngi la tieng ïa kane ka jingnang tlot nang tlot jongu kaba lah ban ktah ïa ka koit ka khiah jongu shirta ruh” ong u Ritre.
“ Ngi sheptieng ruh haba ngi ïohi ba u Chairman u la nangduh bor na kane ka jingshah tngan kumta kum ki para briew ka Seng ka la rai ban kyrpad ïa u ba un leit noh sha ka jaka shah sumar tangba u la ong ba kane ka jingïakhih pat kam pat kut satia” ong u Lyngdoh.
Haduh mynta hi u Chairman um pat sangeh ka jingshah tngan lane ai ei ei ïa u ban ong ba ula pynkut ia ka jingshah tngan wat hapdeng ka jingshah sumar ruh u bteng ïa ka jingshah tngan bad un ïai bteng na katei ka jaka sumar.
Haba pyntip ba u ruh un sdang noh ïa ka jingshah thngan ba khlem buh por. “ Kum u Secretary General nga la shim ïa kane ka rai ba rangbah ban bteng ïa kane ka jingïakhih ba jai jai bad ngan sdang ïa kane ka jingshah thngan jong nga naduh mynta ka miet tad haduh ba ka sorkar kan ai jubab ïa ngi ba ki la rai ban pyndam noh ïa ka soskular ba la ïasoi da kaba weng bad pyngsangeh noh ïa ka ki kot ki sla ba la ïasoi ban ai wai ïa ka Lumpongdeng kaba dei shi bynta na kata ka Umiam Taj Resort and Spa”. ong u Ritre.
Halor ka jingkular jong u Myntri Rangbah ban sei madan ïa ki kot ki sla ba la ïasoi u Ritre u la ong ba kam long kaba sngewthikna ïa kaei kaba u la kren.
Halor ka shithi ba ki la ïoh pdiang na ka tnat kam jngohkai (Tourism) lyngba u Joint Secretary la pynshai ba ym don jingtei satia ha Lumpongdeng hynrei u la ong ka seng ka kwah ban buh jingkylli halor katei ka jingpynshai. Lada phim tei jingtei balei pat la ai wai haduh hynriew phew snem sha ka Umiam Hotel Private Limited. Kumta kam don jingmut satia bad ka long kaei kaei kaba sngewthamula ba ka sorkar kan aiwai ïa ka jaka khlem kano kano ka daw. U la ong ka sorkar kam banse ban sait khuid bad pynshai kdar namar kane ka kam kam dei shuh tang jongka GTF hynrei ka la dei jong ki paidbah hi jongka jylla.
Halor ka jingïakren u la ong naduh ka sngi ba nyngkong la dep pynpaw ba lada wan da ka lynti kaba dei na ka bynta ban ïakren bad ïa pynbeit ka seng ka kloi ban leit hynrei ka dei ban don da ka jingthoh ym tang da ka ktien bad tang lada ai jingthoh ka seng kan leit ban ïakren na ka bynta ka bha ka miat jong ki nongshong shnong ka jylla.