Ngim ïoh jingmyntoi ei ei na ka Hima Mylliem ther ki Rangbah Shnong Ri-Bhoi

Nongpoh, Ïaïong 17: Ka Synjuk ki Rangbah Shnong Ri-Bhoi mynta ka sngi ka la pynpaw ïa ka jingsngewkhia kaba jur halor ka jingïadei hapdeng ki shnong ka them Ri-Bhoi bad ka Hima Mylliem, da kaba kdew ba ka jingïadei kaba jan ka la jah noh bad sah tang ka jingshah khrong khajna na ki paidbah.
Haba kren sha ki lad pathai khubor, u Bah BB Makdoh Chairman ka Synjuk ki Rangbah Shnong Ri-Bhoi District haka jingdonlang u Bah PB Sylliang Secretary u la ong ba watla ka them Ri-Bhoi ka noh synñiang shibun sha ka Hima Mylliem lyngba ki iew ki hat, ki khyrdop bad ka iew masi kaba lah ban kot haduh 50%, hynrei ki khun ki hajar kim ju ïohi dur ïa u Syiem ban wan peit wan jngoh ïa ki, ne ban noh kano kano ka jingïarap na ka liang ka Hima.
U la ong ruh ba kaei kaba ki paidbah ki angnud ka long wat tang ka jingïarap kaba rit uwei u khulom kawei ka ben skul sha ki skul bad ka jingïarap sha kiba duk, ka lah ban long ka jingkyrkhu kaba khraw ïa ka thaiñ. “Hynrei kumba long mynta, ngi sngew kum ki langkñia kiba shu hap ban siew khajna ïa ki mar rep mar riang, hynrei ym ïohi ïa kano kano ka jingmyntoi,” u la ong.
Halor kane, ka Synjuk ka la pynpaw ba ka la dei ka por ban pynsngew paidbah ba ka Ri-Bhoi ka dei ban don la u jong u nongmihkhmat sha ka Hima Mylliem bad ban ïoh bynta ruh ha ka jingjied ïa u Syiem. U Bah Makdoh u la ong ba watla ym pat don ha ka aiñ, hynrei ïa ka aiñ lah ban pynkylla lada don ka mon.
U la bynrap ruh ba u nongmihkhmat uba dei ban peit ïa ka Ri-Bhoi u dei ban long uba tip ïa ka riti ka dustur, ka kolshor bad ka jingeh jingjynjar jong ki paidbah, namar “u trai u tip bha ïa la ka jong ka ri bad ka imlang sahlang.”
Shuh shuh, u la ong ba naduh ki por ba mynshuwa ka la don ka jingïakhih halor kane ka mat bad wat u Lat ka jylla ruh u la ju mynjur, hynrei hadien ka la jah noh. Kumta mynta ka Synjuk ka la rai ban kyrpad ïa ka Hima Mylliem ban sdang ïa ka jingïakren bad ban ailad ïa ka Ri-Bhoi ban ïoh la u jong u nongmihkhmat, da kaba bynrap ruh ba kin sa leit ban kynduh ïa u CEM jong ka District Council ban pynsngew ïa kane ka jingdawa.