Ym don aiñ ban kyntait ïa kino kino ki skhim sorkar ne khaw rashon lada ym don Aadhaar, ong ka AIM

Shillong, Ïaïong 16: Ka Awaken India Movement (AIM), Meghalaya State Chapter ka la pynpaw ba ym don aiñ ban kyntait ïa kino kino ki scheme sorkar lane u khaw rashon tang namar bym don Aadhaar. Ka AIM Meghalaya ka kyntu jur ïa ki paidbah ban tip bad ïada ïa la ka hok la jong bad ka la pynpaw ruh ïa ka jingshisha kaba la mih lyngba ka jubab kaba la ïohpdiang katkum ka RTI (Right to Information) lyngba ka ophis jong u Deputy Commissioner (Supply), East Jaiñtia Hills District.
Kane ka jubab ka long kaba la pynshai ba ym don kano kano ka aiñ lane ka hukum sorkar ban kyntait rashon ïa ki paidbah ba duk tang na ka daw jong ka Aadhaar Card.
La ong ba katkum ka jubab lyngba ka RTI jong u Deputy Commissioner la pynpaw shai ba ym don uwei ruh u nongbat rashon card hapoh East Jaiñtia Hills uba la shah kyntait ban ïoh rashon namar bym don Aadhaar lane bym pat pynïasoh Aadhaar.
Ka jubab ka la kdew shai ruh ba watla ka pynshlur ïa ki Fair Price Shop lane ki Gas Agency halor ka e-KYC, hynrei ym don kano kano ka hukum kaba ailad ïa ki ba kin ong ki bor ba dei khmih ban pynsangeh noh ïa kino kino ki jingmyntoi jong ki paidbah ne wat haduh ban rai pynduh rashon lada ki paidbah kim pat pdiang Aadhaar.
Ka AIM Meghalaya ka la ong ba kane ka pynshisha ba ka Aadhaar kam dei ka jingdonkam kaba kongsan (mandatory) ban ïoh ïa ki jingmyntoi ba dei lyngba ka Sorkar lane kynthup haduh ka rashon hapoh ka Public Distribution System (PDS), bad kino kino ki jingkyntait rashon halor kane ka nongrim kin long kiba pyrshah ïa ka aiñ bad ka hok jong ki paidbah khamtam lada phai halor ka jingshah pynkheiñ noh ka Riti Synshar Paidbah jong ka Ri India (Indian Constitution) katkum ka, Article 14 – Right to Equality: Ka jingpynkheiñ ïa ka jingïaryngkat lada don jingpynïapher hapdeng kiba don Aadhaar bad kiba ym don. Ka Article 21 – Right to Life ne Ka hok ban im kaba kynthup ïa ka hok ban ïoh bam; lada kyntait rashon ka lah ban ktah ïa ka jingim briew.
Ka Article 19(1)(d) & amp; 19(1)(g): Ka jingpyndik ïa ka jingïaid laitluid bad ka kamai kajih lada ki paidbah ki shah ktah ha ki rukom pyntreikam. Ka Article 38 & 39 (Directive Principles): Ka jylla ka dei ban pynneh ïa ka jingbit jingbiang bad jingïaryngkat ha ka imlang sahlang, ym ban pynjynjar ïa ki paidbah khamtam ïa kiba duk.
Ka AIM Meghalaya ka la pynpaw ruh ïa ka jingsngewkhia halor ka jingbymshai ha kaba ïadei bad ki kot ki sla (alternative identity documents) kiba lah ban pyndonkam da kito kiba ym don Aadhaar, namar kane ka bynta la aiti sha ka Directorate of Food, Civil Supplies & Consumer Affairs, Meghalaya, Shillong.
Ha ka jingkhot paidbah, ka AIM Meghalaya ka kyntu ïa baroh ki Fair Price Shop dealers bad ki ophisar ba kin bud ryntih ïa ka nongrim ba ym dei ban kyntait rashon ïa kino kino ki nongïoh jingmyntoi tang na ka daw jong Aadhaar.
Ka la kyntu ruh ïa ka Directorate ba kan pynmih ïa ki kyndon ba shai bad ba thoh paidbah ban pynduna ïa ka jingkulmar ha ki shnong ki thaw bapher bapher.
Ka seng ka la kyntu ïa ki paidbah ba kin long kiba husiar bad kiba tip ïa la ki hok, bad ban mih shakhmat ban ujor lada don kano kano ka jingkyntait ne jingbym biang ha ka rukom sam rashon.
Ka AIM Meghalaya ka la pynkut da kaba ong ba ka jingïoh bam hapoh ka PDS ka dei ka hok bad ka burom jong ki paidbah, bad ym dei ban shah ktah da kino kino ki jingeh administrative ne technical.
Ka seng ka la pynpaw ruh ba kan dang bteng ban buddien ïa kane ka kam ha ryngkatlang bad ki paidbah ban ïada ïa ka hok kum ki nongshong shnong ba pura hapoh jylla ym ba kin long tang kum ki briew kiba wan shongwai shipor lane ki ban shah ïalam bakla lyngba ki Politician kiba shu wan ban pynbiej.