Buh ka BJP ïa ki jingtyrwa ban pynroi ha ki jaka niam jong ki Balang bad Seng Khasi

Shillong, Ïaiong 16: Ka Meghalaya unit jong ka Bharatiya Janata Party (BJP) ka dang pynkhreh ban aiti ïa ki jingtyrwa sha kane ka sorkar pdeng na ka bynta ban kyntiew ïa ki jaka ba kongsan jong ka niam bad ka jaka ba pynneh pynsah ïa ka kolshor ha ka Jylla hapoh ka skhim PRASHAD bad Swadesh Darshan 2.0.
Haba ïakren bad ki lad pathai khubor, u MLA bad nongïalam ba rangbah jong ka BJP u Bah Alexander Laloo Hek u la ong ha ka sngi Palei ba dang shen la don ka jingïakren bad ki nongïalam ka party ban wad ïa ki jaka kiba lah ban long ha Meghalaya kiba lah ban kyntiew hapoh kine ki jingthmu ba kongsan jong ka Union Ministry of Tourism.
U Bah Hek u la pyntip ba ki la don ki jingïamir jingmut hapoh ka State unit, kynthup ïa u state president jong ka party u Rikman Momin, ki nongkitkam bad ki nongtrei ka party, ban lum ïa ki jingai jingmut.
Napdeng ki jingtyrwa ba la ïakren ka long halor ka jingpynheh ïa ka madan Weiking jong ka Seng Khasi Kmie, kaba ki nongïalam ka party ki la batai kum ka jingdonkam kaba kyrkieh.
Kawei pat ka jingai jingmut kaba kynthup ïa ka jingpynroi ne kyntiew ïa ka jaka ha Aitnar ha Jowai, ha kaba la ju pynlong ïa ka jinglehniam Behdiengkhlam man la u snem, kaba thmu ka ban ai jingmyntoi ïa ki nongba ngeit jong ka jingngeit Niamtre bad ki nongshong shnong jong ka thaiñ Jaiñtia Hills.
Ka BJP ka dang bishar bniah ruh ïa ki jingtyrwa ban kyntiew ïa ka Balang Presbyterian kaba la pawnam bha ha Nongsawlia (Sohra)-ba la kheiñ kum ka Balang Khristan kaba nyngkong eh ha Meghalaya-hapoh ki skhim ka sorkar pdeng.Nalor kata, ka seng ka dang wad bniah ban ithuh ïa kawei ka Balang Katholik ha ka Jylla na ka bynta ban kyntiew kum ka jaka leit Pilgrim.
Shuh shuh u Bah Hek u la pynpaw ba la sdang ïa ki jingïakren bad ki nongialam shnong na ka bynta ban kyntiew ïa ka krem Mawjymbuin, kaba la tip paidbah namar ka jinglong tynrai jong ka shivling.Hynrei u la kdew ba katei ka jingtyrwa ka shong ha ka jingmynjur jong ka Executive Committee jong ka Dorbar Shnong.
Haba pynshai ïa ka jingthmu, u Hek u la ban jur ba katei ka jingthmu kam dei kaba la pynlong sain pyrthei.”Kane kam dei ka skhim jong ka BJP.Kano kano ka kam pynroi kaba la leh ha kaba kut yn aiti ha ki Dorbar Shnong lane ki bor shnong ne ki nongialam shnong”, u la ong.
U la bynrap ruh ba haduh mynta ym pat don kano kano ka jingtyrwa kaba la aiti, namar ba ki jingiakren ki dang sah. Ka party kam shym pat la leit ruh ban ïakynduh ïa ki nongialam niam, kynthup ïa ki Balang ne kum ka Seng Khasi Kmie bad ki met Niamtre, watla ki jingïakren kala don.
Utei u nongialam ka BJP u la khot ïa ki nongdon bynta bad ki seng ban wan shakhmat da ki jingtyrwa, da kaba pynthikna ba ka party ka kloi ban sha ka sorkar India.U la pynpaw ruh ba ka jingbei pisa kan paw tang hadien ba la dep pyntreikam ïa ki jingtyrwa.
U Hek u la ong ba ka party shen kan sa lum bad phah shen ïa ki jingmut sha ka sorkar pdeng bad pan jingmut shuh shuh hato ki jingtyrwa ki dei ban ïaid lyngba ka sorkar Jylla ne ban aiti beit.