SHILLONG, ïaïong 13: Ka kynhun ïalehkai jong ka Sputnik Cricket Club ka la kylla long ka lahduh ba nyngkong eh jong ka lympung 1st Late P.A.Sangma Memorial T20 Cricket Tournament 2026 hadien ba ka la pynliem noh ïa ka Royal Cricket Club da 38 ron ha ka phainal hynne ka sngi Nyngkong (13 tarik ïaïong) ha madan kriket ha Polo.
Ha ka jingïalehkai, ka Royal CC ka la jop ïa ka jingkynting pisa (toss) bad aiti sha ka Sputnik CC ba kan sdang tied nyngkong, hynrei kane ka la wanrah pynban ïa ka jingeh ha kaba ka Sputnik ka la tied pyndep ïa ki 20 ober ban kamai 164 ron bad hap noh 8 wiket.
U Gurinder Singh u la long u nongtied ba kongsan tam uba la kyrshan borbah ïa ka Sputnik ban buh ïa ka nongrim kaba skhem, ha kaba u la noh synñiang 64 ron naki 37 bol, katba u Amingshu u la bynrap 26 ron naki 22 bol. Napdeng ki nongkawang bol jong ka Royal CC, u Bipin Ray (3 ober: ailad 22 ron) bad u Dippu Sangma (4 ober: ailad 25 ron) ki la khur mar 2 wiket.
Nangta ka Sputnik ka la pynkut noh ïa ka jingpyrshang jong ka Royal CC da kaba pynkhyllem noh baroh 10 wiket tang na ka bynta 126 ron haki 18 ober. Dei tang u Raj Biswa uba la kham seisoh ha ka tied, da 31 ron naki 14 bol.
Sa shi sien u Gurinder Singh u la long uba kongsan na ka bynta ka Sputnik ha kaba u la khur 2/14 naki 3 ober bad u la pynkut ïa ka jingïalehkai ryngkat ka khusnam Player of the Match, katba uwei pat u nongkawang bol ba seisoh jong ka Sputnik ha kane ka phainal udei u Nafees Siddiqui (khur 2/16 naki 3 ober).
ha kane ka sngi la wan sakhi lang ïa ka jingïakhun phainal da u President ka Meghalaya Cricket Association, James K Sangma, uba la sam ïa ki khusnam sha ka lahduh.
Kum ka lahduh kaba nyngkong eh jong kane ka lympung, ka Sputnik Cricket Club ka la ïohpdiang ïa ka khusnam pisa kaba 1 lak ryngkat ka trophy, katba ka Royal Cricket Club ka la khur ïa ka khusnam pisa kaba 50 hajar kum ka kynhun kaba wan kyrdan ba ar (Runners Up).
Ka la don ruh ka khusnam shimet na ka bynta ka nam ‘Player of the Tournament’ ba la ïoh khur da u Swarajeet Das, ba la sam katkum ka jinglah ban ïalehkai bha, ha kaba u la kamai 298 ron haki 8 inning bad khur 10 wiket haki 9 inning ha baroh kawei ka lympung.
Kane ka sienjam kaba nyngkong jong ka Late PA Sangma Memorial T20 Tournament ba la pynlong da ka Shillong Cricket Association (SCA), la kyrshan da ka PA Sangma Foundation bad la jer kyrteng ïa ka da ka ‘Late PA Sangma Memorial T20 Tournament’ kum ka jingñiew bad kynmaw burom ïa u Myntri Rangbah barim, u MP bad u Lamphang Lok Sabbha ba la khlad noh.
