syntung, ïaïong 13: Ka kynhun ïalehkai jong ka Shiparalok, Syntung kala ïoh rah ïa ka nam lahduh haka Knockout Football Tournament 2026 bala pynïaid da ka Syntung Sports and Cultural Club ha madan phutbol ka Syntung.
Kane ka nam lahduh jong ka Shiparalok, Syntung ka long hadien ba kala lah ban pynliem noh da 1-0 kol ïaka Synroplang Mawsna haka jingïakhun phainal kaba la long ha ka sngi Saitjaiñ 11 tarik u Ïaïong, 2026. Ïa katei ka shikol la thep da u B. Mawthoh.
Ha kane ka sngi la wan kongsan da u Bah Banteidor Lyngdoh MLA ka thaiñ, haka jingdonlang u Sordar Shnong lem bad ki nongkitkam ka club bad ki riew rangbah ka thain.
Ha ka jingïalang sam khusnam ka Shiparalok, Syntung kum ka lahduh ka la ïoh rong ïa ka song pisa kaba 80,000/- tyngka katba ka kynhun Synroplang Mawsna kaba wan kyrdan ba ar kala ïohpdiang ïa ka song pisa kaba 30,000/- tyngka.
Haba ai jingkren kum u kongsan, u Bah Banteidor Lyngdoh u la ai khublei ïa ki nongïalam ka Syntung Sports and Cultural club kaba la lah ban pynlong ïa ka katei ka tournament ba iphuh iphieng, bad u la kyrpad badei ban nang trei shitom shuh shuh khnang ba na kum kine ki lympung yn ïohi bun ki khun samla ka thaiñ ban paw pyrthei bad ïoh ïalehkai ka kiwei kiwei ki kyrdan la ka long ha ka District, State, bad National level.
“Ha kine ki snem ba la leit noh la ïohi ba la bun ki samla ka thaiñ ki ba ïoh ban don ha ki kynhun ïalehkai kiba ïakhun ha ka Shillong Premier League, bad kiwei kiwei namar kata phi dei ban sdang na kum kine ki lympung ban nang trei shitom shuh ban poi sha ka thong”.
U la ban jur ruh ba ki samla kidei ban don ka thong ha khmat eh bad kumjuh ka jingkohnguh sneng, jingtrei shitom bad jingminot ban ïoh jingjop shuwa ba un pynkut da kaba ai khublei ïa baroh artylli ki kynhun ban ïalehkai bha da ka sap ïalehkai football ym da bor.
