Ba haduh mynta ka dang don ka khlam Sniang, ong ka FPFM

Shillong, Ïaïong 10: U Nongaibuit ne Adviser ka Federation of Piggery Farmers Meghalaya (FPFM) u Bah L P Makri, u la ïathuh ba ka jingpang khlam jong ki sniang ka wan na ki sniang kiba wanrah na shabar jylla ym kiba napoh ka jylla.
Haba kren bad ki lad pathai khubor u la ïathuh ba ha ki por mynshwa ym ju tip ïa kata ka khlam African Swine flue hynrei mynta hapoh ki 5 snem eiei ba la wan kane ka jingpang khlam Sniang ha ka jylla.
U Bah Makri u la pynpaw ruh ka jingsngew lyngngoh ba katba bthah ki doktor ka Veterinary ban sumar ïa ki sniang, ban pynkhuid ïa ki sem nalor kiwei kiwei lah dep ban leh lut hynrei kam idon kano kano ka jingïarap.
U la ong ba kum ki nongri sniang la shem ba na ka liang ka tnat kam pat ïoh kino kino ki dawai ne injection ba lah ban Koit ka jingpang khlam ki Sniang.
U la pyntip ba haduh mynta ym pat lah ban ong ba ka khlam Sniang ka la kut ne jah noh namar haduh mynta manla ka Sngi ki sniang ki ïap bad kim kiba ri sniang ruh ki mad jingeh ban ri ïa ki ha ki sem.
Shuh shuh u Bah Makri u la ong ba mynta kiba ri sniang ha ka jylla wat hadien ba ki la dep ban pynkhuid bha ïa la ki jong ki sem hynrei kan ong pat kaba eh ïa ki ban buh ïa ki sniang namar ba tang shu buh ha ki sem tang hapdeng shi sngi ki sniang kin ïohpang bad kin ïap noh, kumta ka long kaba eh bha ban ri sniang ha kane ka por kaba mynta.
Na ka liang jong u, ula ïathuh ba haduh mynta wat na ka liang ki doktor ka Veterinary kim pat lah ban ïoh ka dawai ka ban pynkoit ïa ka khlam bad kim pat lah ruh ban ai ka jingbatai kaba shai ba ha kano ka rukom ki sniang ki ïoh ïa ka jingpang African Swine Flue kumta la hap ban shu phikir hi.
“Ha ki 10 snem ne ha ki por ba mynshwa ym ju bna ïa kata ka jingpang khlam ki sniang, wat ha ka por ba ri la shu buh beit hapoh ka jaka kaba khlem da pynkhuid hynrei ki sniang kim ju ïohpang, kaba lynngoh ba hapdeng tang khyndiat snem pat ba wan kane ka khlam wat ba la bud ïa ki jingbthah ki doktor ruh kane ka jingpang ka dang kynrei haduh mynta ym pat lah ban pynduh jait satia ïa ka,” ong u Bah Makri.
U la kyrpad ïa ka Sorkar ba kan shim ki lad ki lynti ban ïarap ïa kane ka jingeh ba mad da kiba ri sniang ha ka jylla.