Leh donbor ka sorkar ïa ka hok kiba pynpaw pyrshah: Dr. Londoner

Shillong, Ïaïong 09: Ka Voice of the People Party (VPP) ka la pynrem jur ïa ka jingleh donbor bad leh da ka bor jong ka sorkar Meghalaya ha kaba ïadei bad ka jingïakhih pyrshah kaba jar jar jong ka Green Tech Foundation ha kaba ïadei bad ka projek ba la tyrwa hapoh Lumpongdeng, Umïam.
Lyngba ka kyrwoh khubor ba la phah da u nongai ktien ka VPP u Dr. Londoner Murphy Sohtun u la ong ba ka jingkem noh ïa u Chairman jong ka Green Tech Foundation, u Bah H. Bansiewdor Nonglang, ha ka por ba la pynlong ka jingïakhih ba jar jar kaba long ruh katkum ka riti synshar paidbah ka dei ka kam kaba sngewkhia bha.
U la ong, “Kum kine ki jingleh ki pynpaw ïa ka jingpyrshang ban khñiot ïa ka sur jong u paidbah bad pynjem khnap ïa ki hok ba la buh ha ka riti synshar paidbah ha kaba ïadei bad ka jingailad ban shah ban ïalum da kaba jar jar bad ban pynpaw ïa ki jingpyrshah. Ka sorkar ka dei ban kynmaw ba ka jingpynpaw jingpyrshah kam dei ka kam runar hapoh ka ri synshar paidbah. Ka VPP halor kane ka dawa ba dei ban pynlait noh mardor bad khlem tehkyndon ïa u Bah H. Bansiewdor Nonglang bad baroh kiba la shah rah haba ïadei bad kane ka jingïakhih pyrshah kaba jar jar. Kano kano ka jingpyrshang ban kyntur ïa ki nongshong shnong da ki bor pulit kan nang pynngam shuh ïa ka jingbym shah niah shuh jong ki paidbah ha ka sorkar.”
Na ka liang ka VPP ka la banjur biang halor ka jingsngewkhia bad duna ki kam kiba shai halor ka kam ba ai jaka puta hapoh Umïam, kyrpang eh hapoh ka dew lynnong Lumpongdeng. La ong ruh ba ka party ka la ïai banjur ban rah ïa kane ka kam lyngba ki jingïakren bad ki ophisar bad wat hapoh ka Ïing Dorbar Thaw aiñ ka jylla.
Shuh shuh u Nongaiktien ka VPP u la bynrap da kaba ong, “Hynrei ka sorkar ka la pulom bad kam lah ban ai ka jingpynshai kaba biang, ka jingtip kaba shit ba shai sha ki paidbah. Ki nongshong shnong ka Meghalaya ki don ka hok ban tip ïa ki jnit jnat jong kano kano ka jingïamynjur kaba ïadei bad ka khyndew ka shyiap jong ki bad ki nongkynti jingdon jingem ka mariang. Ka jingïai bteng ban sngapjar jong ka sorkar ka wanrah tang ïa ka jingsuba sniew ba halor jongno ne ka bha ka miat jongno ba ka la ai ka jingshakri kaba shisha.”
U la ong ba ka VPP kan ïai ïeng skhem bad ki paidbah ne ki nongshong shnong ban ïada ïa ka khyndew ka shyiap, ka sawdong sawkun bad ki hok nongrim ba la ai hapoh ka riti synshar jong ka jylla bad ka ri baroh kawei ban pynpaw ïa ka sur na ka bynta ka bha ka miat jong baroh lang.