Jur ka shalan sniang na bar jylla, katba ki nongri sniang ha jylla ki dap ram: Chairman FPFM

Shillong, Ïaïong 09: Chairman ka seng Federation of Piggery Farmers Meghalaya (FPFM) u Bah Prosper Dorphang u la ïathuh ba jan baroh kiba ri sniang ha baroh ki district jong ka jylla Meghalaya ki la mad ka jingeh kaba khraw bha hadien ba naduh u snem 2023 ba ki la shim ka Mission Piggery livestock scheme jong ka Sorkar Jylla ki la hap ban shah Ram pynban.
Ka daw kaba kine ki nongri sniang, kiba ka jingthmu hi ka long ban die hapoh la ka jong ka jylla, hynrei ka jingwan sar jong ka khlam Sniang kaba la tip ka African Swine flue kaba dang don haduh mynta baroh ki Sniang ba ki la ri ki la ïap lut bad u Bah Dorphang u la ïathuh ruh ba jan baroh ka doh sniang ba die ha jylla dei kaba wan nabar jylla.
U Bah Prosper Dorphang u la pyntip ba ïa ki sniang ba wan nabar la pynheh pynsan tang hapoh 5 bnai ym kum kiba na jylla bad ka dor uwei u sniang nabar jylla u long T. 15 hajar, katba uba na jylla u long T. 20 hajar hynrei ka jingkoit jingkhiah ka jingheh jingbha u sniang ka la ïapher baklybak.
Halor kane u Bah Dorphang u la pynpaw ha kaba nyngkong ïa ka jingkmen ba ka Sorkar ka la ai ka ram kaba ym donkam siewsut hynrei ka jingeh pat ka long ba kam don ka jingpynshlur ban kyntiew ïa ka ïew ka hat, kumta u la ong ba la hap ban thaw noh da kane ka Federation kaba la sdang naduh ka 21 tarik u Lber mynta u snem ban lumlang ïa baroh ki nongri sniang ha ka jingïalang ka ban long ha ka 18 tarik mynta u bnai ha ka por 10 baje mynstep ha mar pyrshah ka jaka sah jong Chief Justice ka jylla Meghalaya ban ïashim ka rai halor kane ka jingeh ba ki mad.
Ha kaba ïadei bad kane u Bah Dorphang u la ïathuh ba haduh mynta ym pat lah ban batai shai satia la kine ki sniang kiba wan nabar la dep ne em ban leh test ïa ki jingpang ba ki don ha shwa ban die hapoh ki ïew ki hat hapoh ka jylla Meghalaya, kumta u la kyrpad ïa baroh kiba ri sniang, la ki dei na ki Society ne kino kino ki kynhun bad kumjuh ruh kiba na Garo Hills ba kin wan sha ka jingïalang ban pynpaw ïa la ki jong ki jingshem jong ki ban ïoh ïathir ïatai ha ka jingïalang khnang bad ban ïoh rah ban pynpaw ïa kine ki rai jingïakren sha ka sorkar ba kan lah ban shim khia bad ïarap lem ïa baroh kiba ri sniang ha ka jylla baroh kawei.