Shillong, Iaiong 9 : Ka National People’s Party (NPP) ka la pynpaw ba kam don jingkwah satia ban don kano kano ka jingïatreilang bad kiwei ki party na ka bynta ka elekshon shiteng samoi jong ka Shillong Lok Sabha, haba pyntip ba kan dang ban rai ïa u kyrtong na ka bynta kane ka by-Election MP.
“Phi lah ïohi ïa ka saiñ pyrthei ha Meghalaya, ngim don ïa kano kano ka jingïatreilang bad kiwei ki party ha ka Election. Haduh mynta, ngin dang shong pyrkhat ban rai ïa u kyrtong na ka bynta ka elekshon shiteng samoi” ong u Working President ka NPP bad Myntri Sorkar Marcuise N Marak haba ïakren bad ki nongthoh khubor ha ka Sngi Palei.
Haba ïadei bad ka jingjied ïa u kyrtong Rajya Sabha, u Marak ula ong “Shen, ngin yn sa shim ïa ka rai bad ïano ban pynïeng, ngin sa rai ïa kane”.
Halor ka Election Garo Hills Autonomous District Council (GHADC), u Marcuise ula ong ba ka Sorkar ka la pynjlan ïa kane ka ïing Dorbar ba mynta sa hynriew bnai, kaba ailad ban shim ïa ki sienjam ba donkam ban hap pyndep hashuwa ban pynlong ïa ka elekshon. Haba kylli halor ka election ha Assam, u Marcuise u pynpaw ba ka party ka kyrmen skhem ba kan lah ban plie account ha kane ka jylla ba marjan.
