Rai ki Muster Roll ban sangeh ïakhih hadien ba kular u CM ban pynbeit thymmai ïa ka VDA

By Mawphor Editor On Apr 10, 2026

Shillong, Iaiong 9 : Ka All Jaintia Muster Roll Workers and Labour Union (AJMRWLU) ka la rai ban pynsangeh noh ïa ka jingïakhih hadien ka jingwan ïakynduh ïa u Myntri Rangbah ka jylla u Conrad Sangma, uba la pynthikna ïa ka kynhun ba ka sorkar kan pynbeit ryntih noh bad pynthikna ba baroh ki tnad sorkar kin pyntreikam ïa ka hukum ba pynbeit thymmai na ka bynta ka Variable Dearness Allowance (VDA) kaba arsien ha ka shi snem.
Haba ïakren bad ki nongthoh khubor hadien ka jingïalang ha ka sngi Palei, u Adviser ka Union Bah Khroo L Pariat ula ong, “Ka jingïalang bad u Myntri Rangbah ka la long kaba biang bha. Ula pynthikna ïa ngi ba yn sa pynbeit ryntih ïa baroh ki tnad hapoh jong ka Sorkar Meghalaya ban bud ïa ki jingbthah jong ka sorkar. Ula kubur ba ka la don ka jingduna bad ka jingbym biang ka rukom treikam hynrei mynta un sa pynthikna noh ba ki khlieh jong baroh ki tnad kin hap ban bud ryntih ïa man la kawei pa kawei ka jingbthah kaba pynmih”.Ka Union ka la ïai dawa ba dei ban pyntreikam ïa ka jingpynbeit thymmai noh ïa ka VDA, kaba la pynkup bor da ka Minimum Wages Act kaba dei ban pynkylla arsien ha ka shi snem ha ka 1 tarik u Iaiong bad 1 tarik u Risaw.
U Myntri Rangbah ula pynthikna ba yn sa pynmih ïa ka hukum ban pynbeit thymmai ïa ka VDA ha kine ki sngi ban wan. U Bah Pariat ula ong, “U Myntri Rangbah ula mynjur ruh ban khmih bniah ïa ka mat kaba dei bad ka jingshongthait na ka kam namar ba ka dei ka mat kaba pynmih ïa ka jingbym shai ne pynklumar ïa ki jingmut jingpyrkhat. Ula bthah ha ki ophsiar ban buddien ïa kane ka mat jingdawa bad yn sa lum ïa ka jingïalang hashwa ban kut u Iaiong.
Ka Union ka la ai por ïa ka sorkar haduh ban da kut u Iaiong ban pyntreikam ïa katei ka hukum bad lada jia ba ka pulom, kin pynlong da ka jingïakhih kaba heh ha baroh ki District Headquarter jong ka jylla Meghalaya.“Ngi ngin ïai ap shwa ïa ka jingpyntreikam ïa katei ka hukum hapoh jong une u bnai. Lada u Myntri Rangbah ym pyntreikam ïa ka, ngi ngin pynlong ïa ka jingïakhih kaba heh” la maham u Bah Pariat.