Thrang ka ASSA ban pynkiew ïaka kam ïalehkai phutbol haka thaiñ Amlarem: GS

Amlarem, Ïaïong 09: Ka Amlarem Sub-Divisional Sports Association (ASSA) lyngba u General Secretary ma Dapmon Tariang ula pyntip hadien ka jingpyndep jong ki 24 ngut ki Coach ïa ka kyrdan AIFF D License Certificate Football Course u kyrmen skem ba ka thaiñ Amlarem kan sa lah ban pynkiew bha haka kam ïalehkai phutbol hapoh jong katei ka thaiñ.
Ula ong ruh ka ASSA ha ryngkat ka Meghalaya Football Association (MFA) kila dep pynlong ïaka AIFF D License Certificate Football Course kaba la sdang naduh ka 30 tarik u Lber bad pynkut haka 4 tarik u Ïaïong, 2026 ha madan Artificial Turf kaba dang dep shna thymmai ha Ladjaplem Amlarem Block WJHD.
Ïa kitei ki 24 ngut ki Coach la wan ban ai jinghikai (Instructor) da u Mouriya Sethupandian ha kaba kin pyndep ïa ka Exam naduh ka Theory bad ïa ka Practical, kum ka dak ban burom ïa utei u nonghikai ka ASSA kala pynkup burom ïa u da kaba ai sngewbha da ka Memento bad ka jingkitbok kitrwiang.
Shuh shuh ula ong ka jingpyndep jong kitei ki 24 ngut ki Coach ïa ka kyrdan AIFF D License Certificate Football Course kan ïarap shibun eh ïa ka thaiñ War Jaiñtia ba kan sei pyrthei ïa ki rang ïalehkai kiba don shisha ïa ka sap ka phong haka kam ïalehkai phutbol bad kan sa long ruh ka thaiñ kaba kiew bha ha ka liang jong ka phutbol.
Ula pynpaw ruh ka jingai khublei ïa kitei ki Coach kiba la pyndep ïa ka jingshah hikai bad kumjuh ïa ki dkhot ka ASSA kiba kloi ban donlang ha kino kino ki por, ula pyntip ruh naka liang ka ASSA shen kan sa pynlong sa ka D-License Certificate Football Course ban pyntbit shuh shuh ïa kane ka kam ïalehkai phutbol.