SHILLONG, Ïaïong 09: Ka Khasi Students’ Union Mawlai Circle, ha ka 09 tarik Ïaïong, 2026 ka la ïoh ban plie pyrda ïa ka ‘8th Maitshaphrang Khasi League Basketball Tournament 2026’ ha Mawlai Nongpdeng Basketball Court.
Ha kane ka sngi la wan Kongsan da u Samla Donald V Thabah-General Secretary KSU Seng Kmie, ha ka jingïadon lang ki dkhot nongïalam jong ka KSU Mawlai Circle, naduh u President bah Biangbor L Paliar nangta u General Secretary bah Eddie Malñiang lem bad kiwei kiwei. La pynïaid ïa ka jingïalang da u Samla Ozzy Kurbah, Ass. Environment Secretary KSU Mawlai Circle.
Haba ai jingkren kum u Kongsan, u samla Donald V Thabah, u la ai khublei ïa ka KSU Mawlai Circle kaba la shim ïa kane ka sienjam 8 snem mynshwa kum shi bynta ban ai ïa ka rynsan ïa ki para samla ba kin lah ban pyntbit bad ba kin ïoh ïa ka jingshemphang khnang ba kin lah ba kin jam sha ki kyrdan ba kham shalor.
La plie pyrda ïa ka jingïalehkai ba nyngkong hapdeng ka East Khasi Hills Basketball Association pyrshah ïa ka Marbisu Sports Club.
Ha kane ka sienjam kaba phra (‘8th) jong ka lympung Maitshaphrang Khasi League Basketball Tournament 2026, ki don baroh 34 tylli ki kynhun kiba ïashim bynta, kynthup ïa 25 tylli ki kynhun na ka liang ki shynrang bad 9 tylli na ka liang ki kynthei.
Na ka liang jong ki kynthei, ïa ki kynhun la phiah ha ki ar tylli ki thup, ka Pool A kaba don ïa ka D Fence, Synergy, ONYX ‘A’ bad ka Touchline BA; nangta ka Pool B ka kynthup ïa ka ONYX ‘B’, Marbisu Sports Club, East Khasi Hills District Basketball Association, Royal Dribblers bad ka Nongkseh SSCC.
Katba ki shynrang ki don baroh 8 tylli ki Pool ba mar lai tylli ki kynhun lait noh ka Pool H kaba don saw tylli ki kynhun.
Ki kynhun ba shim bynta ha ka liang ki shynrang ki long Pool A: Kynsai Elite, Court Crusaders, Syndicates; Pool B: East Khasi Hills District Basketball Association, KSU NEHU Unit, Maitshaphrang; Pool C: D Academy, AZRIEL, Cold World; Pool D: SYM, ONYX ‘A’, Valiance: Pool E: Bankyntiew BB, DBSA, Seng Samla Mawlai Nongpdeng (SSMN): Pool F: LUSSCO; The Grims; Revolution Dunkers: Pool G: ONYX ‘B’, Kinetics, LDN Ballers: Pool H: Jaiaw Pdeng, Hawks, Scavengers, Young Reapers.
Katkum ka prokram, baroh ki jingïalehkai group stage (shynrang bad kynthei) kin kut ha ka 13 tarik ïaïong. Na ka bynta ki kynthei ka jingïakhun kan ïaid beit beit sha ka Semi final ba la buh ban long ha ka 14 tarik ïaïong, katba ki shynrang yn bud shwa ka Quarter final nangta sa ka semi final ban long ha kajuh ka sngi. ïa ka phainal la buh ban pynlong ha ka 15 tarik ïaïong.
