SHILLONG, ïaïong 08: Ka Sputnik Cricket Club ka la lah ba kan pynliem noh da 6 wiket ïa ka Langsning XI Cricket Club ha ka jingïalehkai Super 8 jong ka Group 1 ha ka lympung Late P.A.Sangma Memorial T20 Cricket Tournament 2026 ba la pynïaid da ka Shillong Cricket Association (SCA), hynne ka sngi Balang ha madan kriket ha Polo.
Hadien ba jop ïa ka jingkynting pisa (toss) ka Sputnik CC ka jied ban bol nyngkong bad khanglad ïa ka Langsning XI CC tang na ka bynta 122 ron haki 20 ober bad pynhap ruh 9 wiket. Nangta hapoh ka jingïalam jong u Punit Bisht (90 ron khlem shah pynhap) ka Sputnik ka la pynskhem ïa ka jingjop da kaba kamai 123 ron.
Ha ka pali tied jong ka Langsning XI CC, u Bamanbha Shangpliang (54 ron naki 50 bol) bad u Ibit Thabah (20 ron naki 11 bol) kidei ki nongtied kiba kongsan tam; katba u Kshittij Singhania (khur 3/19 naki 2 ober) bad u Aditya Singhania (2/21 naki 4 ober) kidei ki nongkawang bol ba seisoh tam jong ka Sputnik.
Nangta ka jingnoh synñiang kaba khraw na u Punit Bisht (90 ron naki 55 bol) uba la pynkut ryngkat ka khusnam Player of The Match, bad katto katne na u Chaman Pushp (24 ron naki 29 bol) ka la ïarap ïa ka Sputnik ban kynjoh sha ka thong tang haki 16.1 ober da kaba hap tang 4 wiket. U Riboklang Hynniewta u la khur 3/17 naki 4 ober.
Ha kawei pat ka jingïalehkai jong ka Group 2, ka Royal Cricket Club ka la khur ei ïa ka nam jop khlem da ïakhun, kata lyngba ka ‘Walkover’ pyrshah ïa ka Capital Stars.
