Shillong, Ïaiong 07 : Ka Meghalaya Football Association (MFA) ka la pyllait ïa ka kyrteng jong ki 278 ngut ki rangïalehkai kiba la ïoh ïa ka jingmynjur na ka bynta ka iew ïa die ïa thied rangïalehkai na kawei ka distrik sha kawei pat kaba dei na ka bynta kane ka samoi ïalehkai jong u 2026.
Baroh ki la don haduh 278 ngut ki rangïalehkai kiba la aplai bad ki la pyndep ruh ïa ki jingdonkam baroh. Kane ka la hiar na ka 39 ngut ha u 2025 watla ka dang dei pat kaba dang biang lada nujor bad ki 122 ngut ha u snem 2024.
Kane ka jingpynkynriah klob ïa ki nongïalehkai ka la kut ha ka 31tarik Lber.
Na ka liang ki klob ba pynïasoh bad ka Shillong Sports Association ki la soi 80 ngut ki nongïalehkai na kiwei ki Synjuk ïalehkai na kiwei ki distrik. Ki klob kiba dei na ka Thadlaskein Sports Association ki don 56 ngut bad na East Jaintia Hills District Football Association pat ki don 42 ngut.
Ki klob ki shim ïa kane ka rynsan kum ka kabu ksiar ban pynkhlain ïa ka kynhun jong ki na ka bynta ka lympung ïalehkai na bynta une u snem kaba dei ruh ha shwa ban sdang ka 5th Meghalaya State League kaba la pynlong da ka Meghalaya Football Association na ka bynta ki klob kiba kham heh ha ka jylla kaban sdang shen ha kine ki khyndiat sngi ban wan.
Haba ïasam ïa kane ka thup kyrteng jong ki rangïalehkai ba la ïoh jingmynjur, u General Secretary ka MFA Bah Sunesh Syiem u la pynkynmaw ïa baroh ki district association ba yn ym shah ïa uno uno u rangïalehkai ban ïalehkai palat na kawei ka district sports association ha ka shisnem.
“Sngewbha ban shimkhia ba ym don satia u nongïalehkai u ban pynkhein ïa kine ki kyndon. Baroh ar, kata u nongïalehkai bad ki district association kin ngat ha ki kyndon jong ka MFA lada ki pynkhein ïa kane,” u la ong.
